કોલંબો : શ્રીલંકાના કોલંબોમાં રમાઈ રહેલા T20 વર્લ્ડ કપ ૨૦૨૬માં પાકિસ્તાને જોરદાર વાપસી કરી છે. ભારત સામેની કારમી હારના આંચકામાંથી બહાર આવીને પાકિસ્તાને બુધવારે નામિબિયાને ૧૦૨ રનના વિશાળ અંતરથી હરાવીને ગૌરવભેર 'સુપર-૮'માં સ્થાન નિશ્ચિત કર્યું છે. આ મેચના અસલી હીરો સાહિબઝાદા ફરહાન રહ્યા હતા, જેમણે પોતાની પ્રથમ આંતરરાષ્ટ્રીય ટી૨૦ સદી ફટકારીને ઈતિહાસ રચી દીધો છે.
સાહિબઝાદા ફરહાનનું 'સદી'નું તોફાન
ટોસ જીતીને પહેલા બેટિંગ કરવા ઉતરેલી પાકિસ્તાની ટીમે નિર્ધારિત ૨૦ ઓવરમાં ૩ વિકેટે ૧૯૯ રનનો ડુંગર ખડક્યો હતો. સાહિબઝાદા ફરહાને માત્ર ૫૮ બોલમાં અણનમ ૧૦૦ રન બનાવ્યા હતા. રસપ્રદ વાત એ છે કે, તેમણે ૫૦ થી ૧૦૦ રન સુધી પહોંચવા માટે માત્ર ૨૦ બોલ જ લીધા હતા. તેમની આ ઈનિંગમાં ૧૧ ચોગ્ગા અને ૪ ગગનચુંબી છગ્ગાનો સમાવેશ થાય છે. ૨૦૧૪માં અહેમદ શહેઝાદ બાદ વર્લ્ડ કપમાં સદી ફટકારનાર તેઓ પાકિસ્તાનના બીજા ખેલાડી બન્યા છે. તેમને કેપ્ટન સલમાન આગા (૩૮ રન) અને શાદાબ ખાન (૩૬* રન) નો પૂરો સહયોગ મળ્યો હતો.
સ્પિનરોની જાળમાં નામિબિયા ક્લીન બોલ્ડ
૨૦૦ રનના લક્ષ્યનો પીછો કરવા ઉતરેલી નામિબિયાની ટીમ પાકિસ્તાની બોલરો સામે તાસના પત્તાની જેમ વિખેરાઈ ગઈ હતી. પાકિસ્તાનના મિસ્ટ્રી સ્પિનર ઉસ્માન તારિકે ઘાતક બોલિંગ કરતા માત્ર ૧૬ રન આપીને ૪ વિકેટ ઝડપી હતી. જ્યારે અનુભવી લેગ-સ્પિનર શાદાબ ખાને ૧૯ રન આપીને ૩ વિકેટ લીધી હતી. નામિબિયાની આખી ટીમ ૧૭.૩ ઓવરમાં માત્ર ૯૭ રન બનાવીને ઓલઆઉટ થઈ ગઈ હતી. આ જીત પાકિસ્તાનની T20 વર્લ્ડ કપ ઈતિહાસની સૌથી મોટી જીત છે.
૨૦૨૮ના વર્લ્ડ કપ માટે પણ ક્વોલિફાય
આ જીત સાથે પાકિસ્તાને માત્ર સુપર-૮ માં જ જગ્યા નથી બનાવી, પરંતુ ૨૦૨૮માં ઓસ્ટ્રેલિયા અને ન્યુઝીલેન્ડમાં યોજાનારા આગામી T20 વર્લ્ડ કપ માટે પણ સીધું ક્વોલિફિકેશન મેળવી લીધું છે. ભારત સામેની હાર બાદ ટીકાકારોના નિશાન પર રહેલી પાકિસ્તાની ટીમે આ મેચમાં સ્ટાર બોલર શાહીન આફ્રિદીને આરામ આપીને ખ્વાજા નફાયને તક આપી હતી, જે સફળ સાબિત થઈ છે.
હવે સુપર-૮માં પાકિસ્તાનનો સામનો કઈ ટીમો સામે થશે અને શું તેઓ આ લય જાળવી રાખશે, તેના પર ક્રિકેટ ચાહકોની નજર છે.