ટીમ ઈન્ડિયા પાસે T20 ફોર્મેટમાં ઘણા મેચ વિજેતા ઓલરાઉન્ડર છે. આમાં હાર્દિક પંડ્યા, અક્ષર પટેલ, વોશિંગ્ટન સુંદર અને શિવમ દુબેનો સમાવેશ થાય છે. આ ખેલાડીઓમાં દુબેનું નામ ભાગ્યે જ લેવામાં આવે છે, પરંતુ તે હવે ટીમ ઈન્ડિયા માટે તારણહાર બની ગયો છે. 

  ટીમ ઈન્ડિયા લીગ સ્ટેજની પોતાની છેલ્લી મેચ દક્ષિણ આફ્રિકા સામે રમી રહી છે. ટોસ જીતીને પહેલા બેટિંગ કરવાનો નિર્ણય લીધા પછી, ટીમની શરૂઆત ખરાબ રહી, જેના કારણે ટીમ મુશ્કેલીમાં મુકાઈ ગઈ. તે સમયે, ફાસ્ટ બોલિંગ ઓલરાઉન્ડર શિવમ દુબે બેટિંગ કરવા માટે ઉતર્યો. પોતાની શાનદાર બેટિંગથી તેણે યુવરાજ સિંહને પાછળ છોડીને એક મોટો રેકોર્ડ બનાવ્યો

   ટીમ ઈન્ડિયા 9 ઓવરમાં ફક્ત 69 રન બનાવીને 3 વિકેટ ગુમાવ્યા બાદ ખૂબ જ ખરાબ સ્થિતિમાં હતી. તે જ ક્ષણે શિવમ દુબે બેટિંગ કરવા આવ્યો અને તેણે ધમાકેદાર ઇનિંગ રમી. દુબેએ 212.90 ના સ્ટ્રાઇક રેટથી બેટિંગ કરતા માત્ર 31 બોલમાં 66 રન બનાવ્યા. શિવમે તેની ઇનિંગમાં 4 ચોગ્ગા અને 6 જબરદસ્ત છગ્ગા ફટકાર્યા, જેનાથી ટીમ ઈન્ડિયા મોટા સ્કોર તરફ આગળ વધી.

   આ સાથે, દુબેએ એક મોટો રેકોર્ડ બનાવ્યો છે. શિવમ દુબે હવે T20 વર્લ્ડ કપમાં 5મા કે તેથી નીચેના નંબર પર બેટિંગ કરતા ખેલાડીઓમાં સૌથી વધુ સ્કોર કરવાનો રેકોર્ડ ધરાવે છે. દુબે પહેલા આ રેકોર્ડ હાર્દિક પંડ્યાના નામે હતો. પંડ્યાએ 2022ના T20 વર્લ્ડ કપમાં ઇંગ્લેન્ડ સામે 63 રન બનાવ્યા હતા. યુવરાજ સિંહ યાદીમાં ત્રીજા નંબરે છે. યુવીએ 2007ના T20 વર્લ્ડ કપમાં ઇંગ્લેન્ડ સામે 58 રન બનાવ્યા હતા

    જ્યારે પણ ટીમ ઈન્ડિયાને મોટી મેચોમાં મુશ્કેલીઓનો સામનો કરવો પડે છે, ત્યારે દુબે તેની ટીમને આગળ વધારવા માટે ટૂંકી પણ મહત્વપૂર્ણ ઇનિંગ્સ રમે છે. એશિયા કપ 2025 ફાઇનલ હોય કે T20 વર્લ્ડ કપ 2024 ફાઇનલ, દુબેએ બંનેમાં મહત્વપૂર્ણ ઇનિંગ્સ રમી હતી. પાકિસ્તાન સામેની છેલ્લી મેચમાં, દુબેએ 27 રનની મહત્વપૂર્ણ ઇનિંગ્સ પણ રમી હતી. T20 વર્લ્ડ કપ 2024 થી, દુબે બોલર તરીકે સારું પ્રદર્શન કરી રહ્યો છે, જેના કારણે તે કેપ્ટન અને મુખ્ય કોચ બંનેનો પ્રિય બન્યો છે.