ઇસ્લામાબાદ:  પાકિસ્તાનની રાષ્ટ્રીય રમત હોકી અત્યારે તેના ઈતિહાસના સૌથી કાળા અને શરમજનક તબક્કામાંથી પસાર થઈ રહી છે. ઓસ્ટ્રેલિયા પ્રવાસ દરમિયાન પાકિસ્તાની ખેલાડીઓને જે રીતે રસ્તા પર રખડવું પડ્યું અને પેટ ભરવા માટે હોટલોમાં વાસણો ધોવા પડ્યા, તે ઘટનાએ આખરે પાકિસ્તાન હોકી ફેડરેશન (PHF) ના પ્રમુખ તારિક બુગતીની ખુરશી છીનવી લીધી છે. ભ્રષ્ટાચાર અને ઘોર ગેરવહીવટના ગંભીર આરોપો વચ્ચે ઘેરાયેલા બુગતીએ વડાપ્રધાન શાહબાઝ શરીફને પોતાનું રાજીનામું સોંપી દીધું છે. આટલું જ નહીં, તેમણે આ મામલે સૈન્ય હસ્તક્ષેપની માંગ કરતા આર્મી ચીફ જનરલ અસીમ મુનીરને પણ તપાસમાં સામેલ થવા વિનંતી કરી છે, જે પાકિસ્તાની રમતગમતમાં સેનાના વધતા પ્રભાવને સ્પષ્ટ દર્શાવે છે.

કેપ્ટન શકીલ અહમદ બટ્ટે જે ખુલાસા કર્યા છે તેણે આખા પાકિસ્તાનને સ્તબ્ધ કરી દીધું છે. એરપોર્ટ પર ૧૪ કલાકની લાંબી રાહ અને હોટલમાં એડવાન્સ પેમેન્ટ ન થવાને કારણે ખેલાડીઓને જે માનસિક યાતનાઓ વેઠવી પડી, તેનાથી ટીમનું પ્રદર્શન પણ કથળ્યું હતું. સૌથી વધુ આઘાતજનક બાબત એ છે કે, પાકિસ્તાન સ્પોર્ટ્સ બોર્ડે (PSB) દાવો કર્યો છે કે તેમણે આ પ્રવાસ માટે ૧ કરોડથી વધુ પાકિસ્તાની રૂપિયા ફેડરેશનને ફાળવ્યા હતા. હવે પ્રશ્ન એ ઉઠે છે કે જો સરકાર તરફથી પૂરતું ભંડોળ મળ્યું હતું, તો ખેલાડીઓને મેચ રમતા પહેલા રસોડું સાફ કરવા અને પ્લેટો ધોવા માટે કેમ મજબૂર કરવામાં આવ્યા? શું આ પૈસા ફેડરેશનના ભ્રષ્ટ અધિકારીઓના ખિસ્સામાં ગયા?

વડાપ્રધાન શાહબાઝ શરીફે આ આંતરરાષ્ટ્રીય સ્તરના અપમાનને ગંભીરતાથી લઈ હાઈ-લેવલ તપાસના આદેશ આપ્યા છે. ખેલાડીઓએ એવો પણ ગંભીર આરોપ લગાવ્યો છે કે તેમને આ ગેરવ્યવસ્થા વિશે મીડિયામાં બોલતા રોકવા માટે શિસ્તભંગની કાર્યવાહી કરવાની ધમકીઓ આપવામાં આવી હતી. એક સમયે જે ટીમ વિશ્વમાં હોકીની બાદશાહ ગણાતી હતી, આજે તે વહીવટી પોલમપોલને કારણે બદનામ થઈ રહી છે. તારિક બુગતીના રાજીનામા બાદ હવે હોકી ફેડરેશનમાં મોટા ફેરફારો આવવાની શક્યતા છે, પરંતુ શું આ તપાસથી ખેલાડીઓને ખરેખર ન્યાય મળશે કે પછી ભ્રષ્ટાચારની આ રમત ચાલુ જ રહેશે, તે તો સમય જ બતાવશે.