અમદાવાદ: T20 વર્લ્ડ કપ 2026માં ભારતીય ટીમ વિજય રથ પર સવાર છે. અમદાવાદના નરેન્દ્ર મોદી સ્ટેડિયમ ખાતે ૧૮ ફેબ્રુઆરીએ રમાયેલી રોમાંચક મેચમાં ભારતે નેધરલેન્ડને ૧૭ રને હાર આપી હતી. આ જીતનો અસલી હીરો ઓલરાઉન્ડર શિવમ દુબે રહ્યો, જેણે ૬૬ રનની તોફાની ઇનિંગ રમીને સ્ટેડિયમમાં બેઠેલા હજારો દર્શકોના દિલ જીતી લીધા હતા. જોકે, મેચ બાદ શિવમે કરેલા ખુલાસાએ સૌનું ધ્યાન ખેંચ્યું છે કે કેવી રીતે એમએસ ધોનીના એક 'ગુરુમંત્રે' તેને મેદાન પર શાંત અને ઘાતક બનાવ્યો છે.
મેચ પૂરી થયા બાદ પ્રેઝન્ટેશન સેરેમનીમાં શિવમ દુબેએ પોતાની સફળતાનો તમામ શ્રેય પૂર્વ કેપ્ટન એમએસ ધોનીને આપ્યો હતો. શિવમે જણાવ્યું કે, "જ્યારે હું IPLમાં રમતો હતો ત્યારે મને શોર્ટ બોલ રમવામાં ઘણી મુશ્કેલી પડતી હતી. ત્યારે માહી ભાઈએ મને પાસે બોલાવીને એક વાત કહી હતી જે આજે પણ મારા મગજમાં ફિટ છે. તેમણે કહ્યું હતું કે, શિવમ, દરેક બોલ પર છગ્ગો મારવો જરૂરી નથી. બાઉન્ડ્રી અને સ્ટ્રાઈક રોટેશન પણ એટલું જ મહત્વનું છે."
શિવમે વધુમાં ઉમેર્યું કે, ધોનીની આ સલાહ બાદ તેની બેટિંગ કરવાની રીત બદલાઈ ગઈ છે. હવે તે મેદાન પર જતાની સાથે જ માત્ર મોટા શોટ્સ રમવા પાછળ નથી ભાગતો, પરંતુ શરૂઆતમાં સ્ટ્રાઈક રોટેટ કરીને ઇનિંગને મજબૂત બનાવે છે અને ડેથ ઓવર્સમાં પોતાનું રૌદ્ર સ્વરૂપ બતાવે છે. નેધરલેન્ડ સામેની મેચમાં પણ તેણે ૫ ગગનચુંબી છગ્ગા ફટકારીને સાબિત કરી દીધું કે તે ટીમ ઇન્ડિયાનો નવો 'સિક્સર કિંગ' છે.
નેધરલેન્ડને પછાડ્યા બાદ હવે ભારતની નજર સુપર-૮ રાઉન્ડ પર છે. ટીમ ઇન્ડિયા તેની પ્રથમ સુપર-૮ મેચ અમદાવાદમાં જ દક્ષિણ આફ્રિકા સામે રમશે. ત્યારબાદ ૨૬ ફેબ્રુઆરીએ ચેન્નાઈમાં ઝિમ્બાબ્વે અને ૧ માર્ચે કોલકાતામાં વેસ્ટ ઇન્ડીઝ સામે ટકરાશે. ક્રિકેટ ચાહકોને આશા છે કે ધોનીના આશીર્વાદ અને શિવમ દુબેના છગ્ગા ભારતને આ વખતે વર્લ્ડ કપ અપાવવામાં મદદરૂપ થશે