કોલકાતા :ટી૨૦ વર્લ્ડ કપ ૨૦૨૬માં વેસ્ટ ઈન્ડિઝના યુવા ફાસ્ટ બોલર શામર જોસેફે પોતાની વિસ્ફોટક બોલિંગ અને ચપળ ફિલ્ડિંગથી ક્રિકેટ જગતમાં સનસનાટી મચાવી દીધી છે. કોલકાતાના ઐતિહાસિક ઈડન ગાર્ડન્સ મેદાન પર રમાયેલી મેચમાં વેસ્ટ ઈન્ડિઝે ઈટાલીને ૪૨ રને હરાવીને ટૂર્નામેન્ટમાં પોતાની જીતનો સિલસિલો યથાવત રાખ્યો છે. આ જીતનો અસલી હીરો શામર જોસેફ રહ્યો, જેણે એક અનોખો વર્લ્ડ રેકોર્ડ પોતાના નામે કર્યો છે.
ઈટાલી સામેની આ મેચમાં શામર જોસેફે મેદાનના ચારેય ખૂણે પોતાનું પ્રભુત્વ જમાવ્યું હતું. તેણે માત્ર ૪ ઓવરના સ્પેલમાં ૩૦ રન આપીને ૪ મહત્વની વિકેટો ઝડપી હતી. એટલું જ નહીં, મેદાન પર ચપળતા બતાવતા તેણે ૪ શાનદાર કેચ પણ પકડ્યા હતા. ટી૨૦ વર્લ્ડ કપના ઈતિહાસમાં આ પ્રથમ વખત બન્યું છે જ્યારે કોઈ ખેલાડીએ એક જ મેચમાં ૪ વિકેટ અને ૪ કેચ (કુલ ૮ આઉટ) માં પોતાનું યોગદાન આપ્યું હોય.
ટોસ હાર્યા બાદ પ્રથમ બેટિંગ કરવા ઉતરેલી વેસ્ટ ઈન્ડિઝની ટીમે ૨૦ ઓવરમાં ૧૬૫ રનનો પડકારજનક સ્કોર બનાવ્યો હતો. સલામી બેટ્સમેન શાઈ હોપે માત્ર ૪૬ બોલમાં ૭૫ રનની આક્રમક ઈનિંગ રમી હતી, જેમાં ૬ ચોગ્ગા અને ૪ છગ્ગાનો સમાવેશ થાય છે. અંતિમ ઓવરોમાં રૂધરફોર્ડ (૨૪ અણનમ) અને રોસ્ટન ચેઝે ઉપયોગી રન ઉમેરીને ટીમને મજબૂત સ્થિતિમાં પહોંચાડી હતી.
૧૬૬ રનના લક્ષ્યાંકનો પીછો કરવા ઉતરેલી ઈટાલીની ટીમ શામર જોસેફની રફ્તાર સામે લાચાર દેખાઈ હતી. જોસેફે ઈટાલીના બેટ્સમેનોને ક્રિઝ પર ટકવા દીધા નહોતા અને આખી ટીમ ૧૮ ઓવરમાં માત્ર ૧૨૩ રન બનાવીને પેવેલિયન ભેગી થઈ ગઈ હતી. ઈટાલી તરફથી કોઈ પણ બેટ્સમેન મોટી ઈનિંગ રમી શક્યો નહોતો.
 વેસ્ટ ઈન્ડિઝે ગ્રુપ સ્ટેજની તમામ ચાર મેચો (ઈંગ્લેન્ડ, અફઘાનિસ્તાન, સ્કોટલેન્ડ અને ઈટાલી) જીતીને ગ્રુપ સીમાં પ્રથમ સ્થાન મેળવ્યું છે. હવે સુપર-૮ રાઉન્ડમાં વેસ્ટ ઈન્ડિઝનો સામનો ભારત, દક્ષિણ આફ્રિકા અને ઝિમ્બાબ્વે જેવી મજબૂત ટીમો સાથે થશે. બે વારની ચેમ્પિયન વિન્ડિઝ ટીમ આ વખતે ત્રીજી વાર ટ્રોફી ઉપાડવાના ઈરાદા સાથે મેદાનમાં ઉતરશે