નવી દિલ્હી: ICC T20 વર્લ્ડ કપ હવે તેના સૌથી રોમાંચક તબક્કામાં પ્રવેશી ચૂક્યો છે. ગ્રુપ સ્ટેજની રસાકસી બાદ આજથી 'સુપર-8' રાઉન્ડનો પ્રારંભ થઈ રહ્યો છે, જ્યાં વિશ્વની આઠ શ્રેષ્ઠ ટીમો સેમીફાઈનલની ટિકિટ મેળવવા માટે લોહીપાણી એક કરશે. આજની પ્રારંભિક મેચમાં જ ક્રિકેટ ચાહકોને હાઈ-વોલ્ટેજ ડ્રામા જોવા મળશે, કારણ કે કોલંબોના આર. પ્રેમદાસા સ્ટેડિયમ ખાતે ન્યુઝીલેન્ડ અને પાકિસ્તાન આમને-સામને થશે. આ મુકાબલો ભારતીય સમય અનુસાર સાંજે ૭:૦૦ વાગ્યે શરૂ થશે.
ભારતનું અભિયાન: અમદાવાદમાં જામશે જંગ
ભારતીય ક્રિકેટ ચાહકોની નજર આવતીકાલની મેચ પર ટકેલી છે. ટીમ ઈન્ડિયા સુપર-8માં પોતાનું પ્રથમ મિશન વિશ્વના સૌથી મોટા ક્રિકેટ મેદાન એટલે કે નરેન્દ્ર મોદી સ્ટેડિયમ, અમદાવાદ ખાતે શરૂ કરશે. ભારતની ટક્કર દક્ષિણ આફ્રિકાના 'પ્રોટીઝ' પડકાર સામે થશે. હોમ ગ્રાઉન્ડ પર રમવાનો ફાયદો ભારતને મળશે, પરંતુ દક્ષિણ આફ્રિકાની ગતિ પણ ભારત માટે કસોટી સમાન બની રહેશે.
ગ્રુપ સમીકરણો અને નવા નિયમો
સુપર-8 માટે ટીમોને બે ગ્રુપમાં વહેંચવામાં આવી છે:
•    ગ્રુપ ૧: ભારત, વેસ્ટ ઈન્ડિઝ, દક્ષિણ આફ્રિકા અને ઝિમ્બાબ્વે.
•    ગ્રુપ ૨: પાકિસ્તાન, ઈંગ્લેન્ડ, ન્યુઝીલેન્ડ અને શ્રીલંકા.
મહત્વની વાત એ છે કે, દરેક ટીમ તેના ગ્રુપની બાકીની ત્રણ ટીમો સામે એક-એક મેચ રમશે. દરેક ગ્રુપમાંથી માત્ર ટોચની બે ટીમો જ નોકઆઉટ સેમીફાઈનલમાં પ્રવેશશે. ખાસ નોંધવા જેવી બાબત એ છે કે સુપર-૮માં તમામ ટીમો 'શૂન્ય' પોઈન્ટથી શરૂઆત કરશે, એટલે કે ગ્રુપ સ્ટેજનો નેટ રન રેટ અહીં ગણતરીમાં લેવાશે નહીં. દરેક મેચ હવે 'કરો અથવા મરો' જેવી બની રહેશે.
ઓસ્ટ્રેલિયાની વિજયી વિદાય અને ઝામ્પાનો જાદુ
ગઈકાલે રાત્રે ગ્રુપ સ્ટેજની અંતિમ મેચમાં ઓસ્ટ્રેલિયાએ ઓમાનને એકતરફી મુકાબલામાં ૯ વિકેટે કચડી નાખ્યું હતું. ઓમાનની ટીમ માત્ર ૧૦૪ રનમાં સમેટાઈ ગઈ હતી, જેમાં સ્પિનર એડમ ઝામ્પાએ ૪ વિકેટ ઝડપીને તરખાટ મચાવ્યો હતો. કાંગારુ ટીમે આ લક્ષ્યાંક માત્ર ૯.૪ ઓવરમાં જ હાંસલ કરી લીધો હતો. આ જીત સાથે ઓસ્ટ્રેલિયાએ પણ પોતાની શક્તિનું પ્રદર્શન કરી દીધું છે.