નવી દિલ્હી: સ્ટાર ફાસ્ટ બોલર જસપ્રીત બુમરાહે ટી20 વર્લ્ડ કપમાં ભારતનો સૌથી સફળ બોલર બની ગયો છે. સાઉથ આફ્રિકા સામે સુપર 8 મેચમાં બુમરાહે શાનદાર બોલિંગ પ્રદર્શન કરતા ત્રણ વિકેટ ઝડપી અને અશ્વિનનો રેકોર્ડ તોડ્યો છે. બુમરાહ ભારત માટે સૌથી વધુ વિકેટ લેનાર બોલર બની ગયો છે. અમદાવાદના નરેન્દ્ર મોદી સ્ટેડિયમમાં બુમરાહે શાનદાર બોલિંગ કરતા ટીમને જોરદાર શરૂઆત અપાવી હતી. ચાર ઓવરના સ્પેલમાં બુમરાહે સૌથી કિફાયતી બોલિંગ કરતા માત્ર 15 રન આપીને વિપક્ષી ટીમના ટોપ ઓર્ડરને તહસ નહસ કરી નાખ્યો હતો.

અશ્વિને ભારત માટે 24 T20 વર્લ્ડ કપ મેચોમાં કુલ 32 વિકેટ ઝડપી હતી. જ્યારે બુમરાહે બે મેચ ઓછી રમીને અશ્વિનનો રેકોર્ડ તોડી નાખ્યો છે. હવે બુમરાહના નામે 22 T20 વર્લ્ડ કપ મેચોમાં 33 વિકેટ થઈ ગઈ છે. આ યાદીમાં ત્રીજા ક્રમે બુમરાહના સાથી પેસર અને આ ફોર્મેટમાં ભારત માટે સૌથી વધુ વિકેટ લેનારા અર્શદીપ સિંહ છે. અર્શદીપે 18 મેચોમાં 32 વિકેટ ઝડપી છે.

બુમરાહે પોતાની પ્રથમ ઓવરમાં જ વિકેટ લેવાનું શરૂ કર્યું હતું અને આ સિદ્ધિ છેલ્લી ઓવર સુધી ચાલુ રહી. પ્રથમ ઓવરના પાંચમા બોલ પર તેણે દક્ષિણ આફ્રિકાના ઓપનર ક્વિન્ટન ડી કોકને બોલ્ડ કર્યો હતો. ડી કોક, જે ડાબા હાથના વિકેટકીપર-બેટ્સમેન છે, તેની ઇનિંગ્સ 7 બોલમાં માત્ર 6 રન પર પૂરી થઈ હતી. બીજી ઓવરમાં બુમરાહે રાયન રિકેલ્ટનને આઉટ કર્યો. રિકેલ્ટન છઠ્ઠા બોલ પર શોટ રમતાં આઉટ થયા અને તેનો કેચ શિવમ દુબેએ પકડ્યો. બુમરાહનો ત્રીજો શિકાર કોર્બિન બોશ બન્યો. ઇનિંગ્સની 19મી ઓવરમાં બુમરાહે પોતાની જ બોલ પર તેમનો કેચ પકડ્યો. રસપ્રદ વાત એ છે કે, બુમરાહે જે ત્રણ ખેલાડીઓને આઉટ કર્યા, તેઓ ત્રણેય IPL ફ્રેન્ચાઇઝી મુંબઈ ઇન્ડિયન્સ માટે બુમરાહ સાથે જ રમે છે. 

બાંગ્લાદેશના શાકિબ અલ હસન ICC મેન્સ T20 વર્લ્ડ કપના ઇતિહાસમાં અત્યાર સુધીમાં સૌથી વધુ વિકેટ લેનારા બોલર છે. તેમણે 2007થી 2024 સુધી બાંગ્લાદેશ માટે 43 મેચ રમી અને 50 વિકેટ ઝડપી છે. T20 વર્લ્ડ કપમાં સૌથી વધુ વિકેટ લેનારા બોલર્સની યાદીમાં શાકિબ પછી એડમ ઝમ્પા, રશિદ ખાન, વાનિન્દુ હસરંગા અને શાહિદ આફ્રિદી છે. અત્યાર સુધી ટોપ 10માં કોઈ ભારતીય બોલર નથી. જોકે, ઝિમ્બાબ્વે અને વેસ્ટઇન્ડિઝ સામે આવતી સુપર 8 મેચોમાં બુમરાહ અને અર્શદીપ પાસે ટોપ 10માં સ્થાન મેળવવાનો મોકો રહેશે.