ચેન્નાઈ: ટી-૨૦ વર્લ્ડ કપ ૨૦૨૬માં ઝિમ્બાબ્વે સામેની મેચમાં વિસ્ફોટક બેટિંગ કરીને ફોર્મમાં પરત ફરેલા યુવા બેટ્સમેન અભિષેક શર્મા અત્યારે ચર્ચામાં છે. પરંતુ તેની આ શાનદાર ઇનિંગ કરતાં પણ વધુ ચર્ચા તેના મેન્ટર અને પૂર્વ દિગ્ગજ ક્રિકેટર યુવરાજ સિંહની એક સોશિયલ મીડિયા કોમેન્ટની થઈ રહી છે. અભિષેકે મેચ બાદ પોતાની ખુશી વ્યક્ત કરતી એક પોસ્ટ શેર કરી, જેના પર યુવરાજ સિંહે પોતાની 'ક્લાસિક સ્ટાઈલ'માં પ્રતિક્રિયા આપી છે.
અભિષેક શર્માએ ઇન્સ્ટાગ્રામ પર પોતાની ઇનિંગના ફોટા શેર કર્યા હતા. આ પોસ્ટ પર યુવરાજ સિંહે કોઈ લાંબુ લખાણ લખવાને બદલે માત્ર એક 'ચપ્પલ'નું ઇમોજી કોમેન્ટ કર્યું. યુવીની આ સ્ટાઈલ જોઈને ચાહકોમાં હાસ્યનું મોજું ફરી વળ્યું છે. ક્રિકેટ ફેન્સનું માનવું છે કે યુવરાજ સિંહ પોતાના શિષ્યને વધુ પડતા હવામાં ન ઉડવા અને સતત મહેનત કરતા રહેવા માટે 'પ્રેમભર્યો ઠપકો' આપી રહ્યા છે. આ કોમેન્ટને ગણતરીની મિનિટોમાં હજારો લાઈક્સ મળી હતી.
અભિષેક શર્મા માટે આ વર્લ્ડ કપની શરૂઆત ઘણી નિરાશાજનક રહી હતી. અગાઉની ચાર ઇનિંગ્સમાં તે ૦, ૦, ૦ અને ૧૫ રન બનાવીને સસ્તામાં આઉટ થઈ ગયો હતો. વિરોધી ટીમો તેની નબળાઈનો ફાયદો ઉઠાવી રહી હતી. જોકે, ૨૬ ફેબ્રુઆરીએ ચેન્નાઈના મેદાન પર તેણે ૩૦ બોલમાં ૫૫ રન (૩ ચોગ્ગા, ૪ છગ્ગા) ફટકારીને ટીકાકારોના મોઢા બંધ કરી દીધા હતા. તેની આ ઇનિંગની મદદથી ભારતે ૨૫૬ રનનો ઐતિહાસિક સ્કોર બનાવ્યો હતો.
અત્રે ઉલ્લેખનીય છે કે કોવિડ લોકડાઉન દરમિયાન યુવરાજ સિંહે અભિષેક શર્માને પર્સનલ કોચિંગ આપીને તૈયાર કર્યો હતો. યુવરાજ તેને પોતાના નાના ભાઈની જેમ રાખે છે અને તેની નાની નાની ભૂલો પર કડક નજર રાખે છે. ઝિમ્બાબ્વે સામેની આ જીતે ભારતનો સેમીફાઈનલનો રસ્તો સાફ કરી દીધો છે, ત્યારે અભિષેકનું ફોર્મમાં આવવું ટીમ ઇન્ડિયા માટે સારા સમાચાર છે. અહેવાલ મુજબ, યુવરાજ સિંહની આ કોમેન્ટ ફરી એકવાર સાબિત કરે છે કે મેદાનની બહાર પણ તે એક સજાગ માર્ગદર્શક તરીકે પોતાની જવાબદારી નિભાવી રહ્યા છે.