ઇસ્લામાબાદ :પાકિસ્તાની ક્રિકેટરો પોતાની રમત કરતા અવારનવાર તેમના વિવાદાસ્પદ નિવેદનોને કારણે ચર્ચામાં રહેતા હોય છે. આ યાદીમાં ફરી એકવાર ભૂતપૂર્વ ઝડપી બોલર મોહમ્મદ આમિરનું નામ ઉછળ્યું છે. T20 વર્લ્ડ કપ 2026 ના રોમાંચ વચ્ચે આમિરે ભારતીય ટીમ વિશે એક અત્યંત બેજવાબદાર નિવેદન આપ્યું છે. આમિરે દાવો કર્યો છે કે સૂર્યકુમાર યાદવની આગેવાની હેઠળની ભારતીય ટીમ આ વખતે વર્લ્ડ કપની સેમીફાઇનલમાં પહોંચી શકશે નહીં.

   આમિરે એક ઈન્ટરવ્યુ દરમિયાન જણાવ્યું કે, "પાકિસ્તાન ક્વોલિફાય કરે કે ન કરે, પરંતુ ભારત સેમીફાઇનલની રેસમાંથી બહાર થઈ જશે." આ નિવેદન એવા સમયે આવ્યું છે જ્યારે ભારતીય ટીમે તાજેતરમાં જ ઝિમ્બાબ્વેને ૭૨ રને હરાવીને જોરદાર વાપસી કરી છે. જોકે, ટીમ ઈન્ડિયા માટે આગળની સફર પડકારજનક છે, કારણ કે તેમનો હવે પછીનો મુકાબલો વેસ્ટ ઈન્ડિઝ સામે છે. જો ભારત વેસ્ટ ઈન્ડિઝને પરાજિત કરવામાં સફળ રહે છે, તો જ તે સેમીફાઇનલમાં પ્રવેશ મેળવી શકશે, જ્યાં સંભવિત રીતે તેનો સામનો ઈંગ્લેન્ડ સાથે થઈ શકે છે.
  મોહમ્મદ આમિરના આ નિવેદન બાદ સોશિયલ મીડિયા પર ભારતીય ક્રિકેટ પ્રેમીઓએ તેને આડે હાથ લીધો છે. ઘણા લોકોનું કહેવું છે કે પાકિસ્તાની ખેલાડીઓએ પોતાની ટીમની ચિંતા કરવી જોઈએ, જે અત્યારે પોતે સંઘર્ષ કરી રહી છે. ખાસ કરીને તાજેતરમાં અફઘાનિસ્તાને ઇસ્લામાબાદ સુધી કરેલી એરસ્ટ્રાઇક અને પાકિસ્તાનની આંતરિક સુરક્ષાની સ્થિતિ વચ્ચે આમિરનું ક્રિકેટ પરનું આવું નિવેદન માત્ર ધ્યાન ખેંચવાનો પ્રયાસ હોય તેમ લાગે છે.
ભારતીય ટીમ અત્યારે વેસ્ટ ઈન્ડિઝ સામેની મેચ માટે વિશેષ વ્યૂહરચના બનાવી રહી છે. કોચના જણાવ્યા અનુસાર, તિલક વર્મા અને સૂર્યકુમાર યાદવ પર ટીમની બેટિંગનો મોટો આધાર છે. જો ભારત આ મેચ જીતી જાય છે, તો આમિર જેવા ટીકાકારોને મેદાન પર જ જડબાતોડ જવાબ મળી જશે. હવે આખી દુનિયાની નજર ભારત અને વેસ્ટ ઈન્ડિઝ વચ્ચેના આ 'કરો યા મરો' જંગ પર ટકેલી છે.