કોલકાતા: કોલકાતાના ઐતિહાસિક ઈડન ગાર્ડન્સ મેદાન પર રમાયેલી T20 વર્લ્ડ કપ 2026ની 'કરો યા મરો' મેચમાં ભારતે વેસ્ટ ઈન્ડિઝને હરાવીને ટુર્નામેન્ટમાંથી બહાર કરી દીધું છે. આ હાર સાથે જ વેસ્ટ ઈન્ડિઝનું વર્લ્ડ ચેમ્પિયન બનવાનું સપનું રોળાઈ ગયું છે. મેચ બાદ વેસ્ટ ઈન્ડિઝના કેપ્ટન શાઈ હોપ અત્યંત નિરાશ દેખાતા હતા અને તેમણે ટીમની હાર માટે પોતાને જ જવાબદાર ઠેરવ્યા હતા.
"હા, હું હાર માટે ગુનેગાર છું"
વેસ્ટ ઈન્ડિઝે પ્રથમ બેટિંગ કરતા 195 રનનો વિશાળ સ્કોર બનાવ્યો હતો, પરંતુ કેપ્ટન શાઈ હોપની બેટિંગે ટીમને મુશ્કેલીમાં મૂકી દીધી હતી. હોપે સ્વીકાર્યું કે, "હું હારનો દોષ સ્વીકારું છું. મારે વધુ ઝડપથી રન બનાવવા જોઈતા હતા. મેં 33 બોલમાં માત્ર 32 રન બનાવ્યા અને તેમાં 17 બોલ તો ડોટ હતા. જ્યારે તમે ટીમનું નેતૃત્વ કરી રહ્યા હોવ, ત્યારે તમારે ગતિ આપવી પડે છે, જે આજે હું ન કરી શક્યો."
સંજુ સેમસનનો 'ક્લાસ': 97 રનની વિસ્ફોટક ઈનિંગ
ભારત માટે આ મેચમાં અસલી હીરો સંજુ સેમસન સાબિત થયો. લાંબા સમયથી ટીમમાં સ્થાન માટે સંઘર્ષ કરી રહેલા સંજુએ વેસ્ટ ઈન્ડિઝના બોલરોની બરાબરની ધોલાઈ કરી હતી. તેણે અણનમ 97 રન બનાવીને ભારતને વિજય અપાવ્યો હતો. સંજુની પ્રશંસા કરતા શાઈ હોપે કહ્યું, "સંજુએ જે રીતે ઈનિંગ મેનેજ કરી તે અદભૂત હતું. તે આજે A-પ્લસ ગ્રેડનો હકદાર છે. કાશ તે આજે અમારી સામે આવી ઈનિંગ ન રમ્યો હોત!"
વરુણ ચક્રવર્તીની જાળ અને ભારતીય રણનીતિ
ભારતીય કેપ્ટન સૂર્યકુમાર યાદવે ટોસ જીતીને બોલિંગનો નિર્ણય કર્યો હતો. અર્શદીપ અને હાર્દિક પંડ્યાએ શરૂઆતમાં અંકુશ રાખ્યો હતો, જ્યારે મિસ્ટ્રી સ્પિનર વરુણ ચક્રવર્તીએ શાઈ હોપને ક્લીન બોલ્ડ કરીને વેસ્ટ ઈન્ડિઝની ગતિ રોકી દીધી હતી. જોકે પોવેલ અને હોલ્ડરે અંતમાં સ્કોર 195 સુધી પહોંચાડ્યો હતો, પરંતુ ઈડન ગાર્ડન્સમાં ઝાકળના કારણે પાછળથી બેટિંગ કરવી સરળ બની ગઈ હતી અને સંજુએ તેનો પૂરો ફાયદો ઉઠાવ્યો હતો.
સંજુનું શાનદાર 'કમબેક'
વર્લ્ડ કપની શરૂઆતમાં સંજુ સેમસન ટીમની પ્રથમ પસંદગી નહોતો. ટીમ ઈશાન કિશન અને અભિષેક શર્મા પર દાવ લગાવી રહી હતી. પરંતુ દક્ષિણ આફ્રિકા સામેની હાર બાદ સંજુને તક મળી અને તેણે સાબિત કરી દીધું કે તેનામાં હજુ ઘણું ક્રિકેટ બાકી છે. આ ઈનિંગ સાથે સંજુએ ભારતીય ટીમમાં પોતાનું સ્થાન વધુ મજબૂત કરી લીધું છે.