પર્થ, તા. ૦૫: ન્યુઝીલેન્ડની ટીમે ફરી એકવાર સાબિત કરી દીધું છે કે કેમ તેમને 'આઈસીસી ટુર્નામેન્ટના જાયન્ટ્સ' કહેવામાં આવે છે. T20 વર્લ્ડ કપ ૨૦૨૬ની પ્રથમ સેમિફાઇનલમાં ન્યુઝીલેન્ડે દક્ષિણ આફ્રિકાને ૯ વિકેટે હરાવીને ફાઇનલમાં પોતાનું સ્થાન પાકું કરી લીધું છે. આ જીત માત્ર ફાઇનલની ટિકિટ નથી, પરંતુ ગ્રુપ સ્ટેજમાં અમદાવાદમાં મળેલી હારનો મધુર બદલો પણ છે.

આ મેચમાં દક્ષિણ આફ્રિકાએ ૧૭૦ રનનો સન્માનજનક સ્કોર બનાવ્યો હતો, પરંતુ ન્યુઝીલેન્ડના ઓપનર ફિન એલન કઈંક અલગ જ મૂડમાં હતા. તેણે માત્ર ૩૩ બોલમાં સદી ફટકારીને આફ્રિકન બોલરોની લાઈન અને લેન્થ બગાડી નાખી હતી. ન્યુઝીલેન્ડે આ વિશાળ લક્ષ્યાંક માત્ર ૧૨.૫ ઓવરમાં હાંસલ કરીને વિશ્વભરના ક્રિકેટ ચાહકોને સ્તબ્ધ કરી દીધા હતા.

મિશેલ સેન્ટનરે શું કર્યો ખુલાસો?

મેચ બાદ કેપ્ટન મિશેલ સેન્ટનરે હસતા મુખે સ્વીકાર્યું હતું કે, "હું જૂઠું નહીં બોલું, આટલી આસાનીથી રન ચેઝ થતા જોઈને મને ખૂબ આનંદ થયો છે." સેન્ટનરે અમદાવાદની હારને યાદ કરતા કહ્યું કે, "અમને ખબર હતી કે અમે અમદાવાદમાં અમારી ક્ષમતા મુજબ રમ્યા નહોતા. આજે અમારો પ્લાન તેમને સતત દબાણમાં રાખવાનો હતો. અમે શરૂઆતમાં સ્પિનનો ઉપયોગ કર્યો જે સફળ રહ્યો. ફિન એલનની ઇનિંગ વિશે બોલવા માટે શબ્દો ઓછા છે, ૩૩ બોલમાં ૧૦૦ રન... તે ખરેખર અવિશ્વસનીય હતું!"

ફાઇનલ માટે કીવી ટીમ તૈયાર

સેન્ટનરે વધુમાં ઉમેર્યું કે, "અમે હજુ સુધી આ ટુર્નામેન્ટમાં 'પરફેક્ટ ગેમ' રમ્યા નહોતા, પણ આજે અમે શરૂઆતથી અંત સુધી શાનદાર રહ્યા. હવે અમારી નજર ફાઇનલ પર છે. ત્યાંની પિચ અને મેદાનની સાઈઝ અલગ હશે, પણ આજની આ જીતથી અમારો આત્મવિશ્વાસ સાતમા આસમાને છે." કીવી કેપ્ટને સ્પષ્ટ કર્યું કે લાલ માટી હોય કે કાળી માટી, તેમની ટીમ દરેક પરિસ્થિતિમાં લડવા માટે સજ્જ છે.

દક્ષિણ આફ્રિકા માટે સ્ટબ્બ્સ અને જેન્સને લડત આપી હતી, પરંતુ ફિન એલનના તોફાન સામે પ્રોટિયાઝ ટીમ પાંદડાની જેમ વિખેરાઈ ગઈ હતી. હવે જોવાનું એ રહેશે કે ફાઇનલમાં ન્યુઝીલેન્ડ સામે ભારત આવે છે કે ઇંગ્લેન્ડ!