નવી દિલ્હી: T20 વર્લ્ડ કપ 2026 હવે તેના રોમાંચક અંત તરફ છે, પરંતુ મેદાનની બહાર ખેલાડીઓ વચ્ચેના નિવેદનોનો જંગ અટકવાનું નામ નથી લેતો. પાકિસ્તાની ફાસ્ટ બોલર મોહમ્મદ આમિર ટુર્નામેન્ટની શરૂઆતથી જ ભારતીય યુવા ઓપનર અભિષેક શર્મા પર નિશાન સાધી રહ્યો છે. તાજેતરમાં એક ઈન્ટરવ્યુમાં જ્યારે આમિરને પૂછવામાં આવ્યું કે શું તેના 'સ્લેપર' (માત્ર બેટ વીંઝનાર) કહેવાથી અભિષેકની કરિયર પર ખરાબ અસર પડી છે? ત્યારે આમિરે ફરી એકવાર આકરા પ્રહાર કર્યા હતા.
અભિષેકની નબળાઈ અને આમિરની ભવિષ્યવાણી
વર્લ્ડ કપ ૨૦૨૬માં અભિષેક શર્માનું પ્રદર્શન અત્યંત નિરાશાજનક રહ્યું છે. ૭ ઇનિંગ્સમાં માત્ર ૮૯ રન અને શરૂઆતની ત્રણ મેચમાં સતત 'ઝીરો' પર આઉટ થવાને કારણે તે ટીકાકારોના નિશાને છે. આમિરે અગાઉ તેને 'સ્લોગર' (Slogger) કહ્યો હતો. હવે ફરીથી તેણે સ્પષ્ટ કર્યું કે, "અભિષેક જેવા ખેલાડીઓ દ્વિપક્ષીય શ્રેણીમાં તો રન બનાવી લે છે, પણ જ્યારે વાત મોટી ICC ટુર્નામેન્ટની આવે છે ત્યારે તેમની ટેકનિકલ ખામીઓ ખુલ્લી પડી જાય છે. વિરોધી ટીમોએ હવે તેને ઓળખી લીધો છે."
સંજુ સેમસન સાથે સરખામણી
યુટ્યુબ ચેનલ પરની ચર્ચા દરમિયાન આમિરે અભિષેકની સરખામણી સંજુ સેમસન સાથે કરી હતી. તેણે સમજાવ્યું કે સંજુ કેમ સફળ છે? આમિરના મતે, સંજુ પાસે મજબૂત ટેકનિક, વર્ષોનો ફર્સ્ટ ક્લાસ ક્રિકેટનો અનુભવ અને IPLની લાંબી ઇનિંગ્સ છે. જ્યારે અભિષેક હજુ પણ આધુનિક T20 ક્રિકેટના '360 ડિગ્રી' શૉટ્સ રમવામાં પાછળ છે. આમિરે ટોણો મારતા કહ્યું કે, જે ખેલાડીને બોલની લાઈનમાં આવીને રમતા ન આવડતું હોય તેને પ્રોપર બેટ્સમેન કેવી રીતે કહી શકાય?
અશ્વિને આપ્યો હતો જડબાતોડ જવાબ
ઉલ્લેખનીય છે કે, જ્યારે ટુર્નામેન્ટની વચ્ચે આમિરે અભિષેકની ટીકા કરી હતી, ત્યારે ભારતીય સ્પિનર રવિચંદ્રન અશ્વિને તેની વ્હારે આવીને વળતો પ્રહાર કર્યો હતો. અશ્વિને કહ્યું હતું કે, "તમે ગમે તે કહો પણ અભિષેક સ્લોગર નથી." જોકે, સેમીફાઈનલમાં પણ અભિષેક માત્ર ૯ રને આઉટ થતા આમિરને ફરી બોલવાનો મોકો મળી ગયો છે. હવે જોવાનું એ રહેશે કે આવતીકાલની ફાઈનલમાં અભિષેક પોતાના બેટથી આ તમામ ટીકાઓનો જવાબ આપે છે કે નહીં.