અમદાવાદ: ક્રિકેટ ચાહકો માટે રવિવારની સાંજ અત્યંત રોમાંચક રહેવાની છે, કારણ કે T20 વર્લ્ડ કપ ૨૦૨૬ના ખિતાબ માટે ભારત અને ન્યૂઝીલેન્ડ આમને-સામને ટકરાશે. આ હાઈ-વોલ્ટેજ ફાઈનલ મેચમાં માત્ર ટ્રોફી જ નહીં, પરંતુ છેલ્લા ૧૮ વર્ષથી અતૂટ રહેલા એક ખાસ રેકોર્ડ પર પણ સૌની નજર ટકેલી છે. શ્રીલંકાએ ૨૦૦૭માં કેન્યા સામે બનાવેલા ૨૬૦ રનનો 'સૌથી વધુ સ્કોર'નો રેકોર્ડ આ વર્ષે ત્રણ વખત તૂટતા-તૂટતા રહી ગયો છે.
   ચાલુ વર્લ્ડ કપમાં બેટ્સમેનોએ જે રીતે રનનો વરસાદ કર્યો છે તે જોતા આ રેકોર્ડ જોખમમાં જણાય છે. ભારતે ચેન્નાઈમાં ઝિમ્બાબ્વે સામે ૨૫૬ રન બનાવ્યા હતા, જે રેકોર્ડથી માત્ર ૪ રન દૂર રહી ગયા હતા. તેવી જ રીતે, સેમીફાઈનલમાં વાનખેડે સ્ટેડિયમ ખાતે ઈંગ્લેન્ડ વિરુદ્ધ ટીમ ઈન્ડિયાએ ૨૫૩ રનનો પહાડ ખડક્યો હતો. વેસ્ટ ઈન્ડિઝે પણ ઝિમ્બાબ્વે સામે ૨૫૪ રન બનાવીને શ્રીલંકાના રેકોર્ડને હચમચાવી નાખ્યો હતો, પરંતુ ૧૮ વર્ષ જૂનો ૨૬૦ રનનો આંકડો હજુ પણ અજેય રહ્યો છે.
 ફાઈનલ મેચ અમદાવાદના નરેન્દ્ર મોદી સ્ટેડિયમમાં રમાવાની છે. અહીની પિચ ઝડપી બોલરોને મદદરૂપ તો છે જ, પણ જો બેટ્સમેન એકવાર સેટ થઈ જાય તો ચોગ્ગા-છગ્ગાની રમઝટ બોલાવી શકાય છે. ન્યૂઝીલેન્ડની શિસ્તબદ્ધ બોલિંગ સામે રોહિત-કોહલી અને સૂર્યાની જોડી જો આક્રમક મૂડમાં જણાશે, તો ચોક્કસપણે શ્રીલંકાનો વર્ષો જૂનો રેકોર્ડ અમદાવાદની ધરતી પર ધ્વસ્ત થઈ શકે છે.
 આ મેદાન પર ઝાકળ (Dew) એક મોટું પરિબળ બની શકે છે, તેથી જે પણ કેપ્ટન ટોસ જીતશે તે પહેલા બોલિંગ કરવાનું પસંદ કરી શકે છે. ભારત અત્યાર સુધી આ ટુર્નામેન્ટમાં માત્ર એક જ મેચ દક્ષિણ આફ્રિકા સામે હાર્યું છે, જ્યારે ન્યૂઝીલેન્ડે બે મેચમાં હારનો સામનો કરવો પડ્યો છે. આંકડાઓની દૃષ્ટિએ ભારત ફેવરિટ મનાઈ રહ્યું છે, પણ ન્યૂઝીલેન્ડ ફાઈનલ જેવી મોટી મેચોમાં હંમેશા સરપ્રાઈઝ આપવા માટે જાણીતું છે. શું ટીમ ઈન્ડિયા ટ્રોફીની સાથે ૨૬૦ રનનો આ ઐતિહાસિક આંકડો પણ પાર કરશે? તે જોવું રસપ્રદ રહેશે.