બર્મિંગહામ: ભારતીય બેડમિન્ટનના પોસ્ટર બોય લક્ષ્ય સેને ઇંગ્લેન્ડના બર્મિંગહામમાં રમાઈ રહેલી પ્રતિષ્ઠિત 'ઓલ ઇંગ્લેન્ડ ઓપન બેડમિન્ટન ચેમ્પિયનશિપ ૨૦૨૬' માં ઇતિહાસ રચી દીધો છે. ૨૪ વર્ષીય લક્ષ્ય સેને અત્યંત રોમાંચક અને શારીરિક રીતે કપરી ગણાતી સેમીફાઈનલમાં કેનેડાના ઉભરતા સ્ટાર વિક્ટર લાઈને હરાવીને બીજી વખત આ ટુર્નામેન્ટની ફાઈનલમાં પ્રવેશ કર્યો છે. આ જીત સાથે જ લક્ષ્ય સેન હવે પ્રકાશ પાદુકોણ (૧૯૮૦) અને પુલેલા ગોપીચંદ (૨૦૦૧) ના ક્લબમાં સામેલ થવા માટે સજ્જ છે.

પીડા પર ભારે પડ્યો વિજયનો જુસ્સો

બર્મિંગહામના કોર્ટ પર રમાયેલી આ મેચ માત્ર રમતની નહીં, પરંતુ સહનશક્તિની પણ કસોટી હતી. ત્રીજા સેટમાં લક્ષ્ય સેન પગમાં સ્નાયુઓના ખેંચાણને કારણે ભારે પીડામાં દેખાતો હતો. તે કોર્ટ પર લંગડાતો હતો, તેમ છતાં તેણે હાર માનવાનો ઇનકાર કર્યો અને ૩૫૪ કિમી/કલાકની અવિશ્વસનીય ઝડપે વિનિંગ સ્મેશ ફટકારી પોતાની આક્રમકતા બતાવી હતી. સામે પક્ષે વિક્ટર લાઈ પણ લોહીલુહાણ થયો હતો, જેના કારણે મેચ દરમિયાન મેડિકલ બ્રેક પણ લેવો પડ્યો હતો. અંતે લક્ષ્ય સેને ૨૧-૧૬, ૧૮-૨૧, ૨૧-૧૫ થી બાજી મારી લીધી હતી.

ચેમ્પિયન્સને હરાવી ફાઈનલની ટિકિટ મેળવી

લક્ષ્ય સેનની ફાઈનલ સુધીની સફર કોઈ ફિલ્મી પટકથાથી ઓછી નથી. તેણે ટુર્નામેન્ટના શરૂઆતના રાઉન્ડમાં જ વિશ્વના નંબર વન અને ડિફેન્ડિંગ ચેમ્પિયન શી યુકીને હરાવીને મોટો અપસેટ સર્જ્યો હતો. ત્યારબાદ ક્વાર્ટર ફાઈનલમાં વિશ્વના છઠ્ઠા નંબરના ખેલાડી લી શિફેંગને હરાવીને પોતાનો આત્મવિશ્વાસ સાબિત કર્યો હતો. હવે ફાઈનલમાં તેનો મુકાબલો ચાઈનીઝ તાઈપેઈના લિન ચુન-યી સામે થશે.

જો લક્ષ્ય આ ફાઈનલ જીતી જાય છે, તો તે ૨૫ વર્ષ બાદ આ ટાઇટલ જીતનારો પ્રથમ ભારતીય પુરુષ ખેલાડી બનશે. આખું ભારત અત્યારે લક્ષ્ય સેન માટે પ્રાર્થના કરી રહ્યું છે કે તે ટ્રોફી સાથે સ્વદેશ પરત ફરે.