એડિલેડ (ઓસ્ટ્રેલિયા), તા. 12: ઓસ્ટ્રેલિયાના પ્રતિષ્ઠિત કુયોંગા ગોલ્ફ ક્લબ ખાતે રમાઈ રહેલી મહિલા ઓસ્ટ્રેલિયન ઓપનમાં આ વખતે ભારતનો ત્રિરંગો શાનદાર રીતે લહેરાઈ રહ્યો છે. લેડીઝ યુરોપિયન ટૂર (LET) ના ભાગરૂપે રમાઈ રહેલી આ ટુર્નામેન્ટમાં ભારતની સ્ટાર ગોલ્ફર દીક્ષા ડાગર ફરી એકવાર ભારતીય પડકારનું નેતૃત્વ કરવા માટે તૈયાર છે. દીક્ષાની સાથે અન્ય ચાર પ્રતિભાશાળી ભારતીય ખેલાડીઓ પણ આ હાઈ-પ્રોફાઈલ સ્પર્ધામાં પોતાની તાકાત બતાવશે.
ભારતીય પંચરત્નો પર નજર
આ અઠવાડિયે ભારત તરફથી પાંચ મહિલા ગોલ્ફરો મેદાનમાં ઉતરશે. દીક્ષા ડાગરની સાથે પ્રણવી ઉર્સ, અવની પ્રશાંત અને હિતાશી બક્ષી પોતાની લય જાળવી રાખવા મથશે. આ ઉપરાંત, અનુભવી ગોલ્ફર વાણી કપૂર પણ આમંત્રિત ખેલાડી તરીકે આ ટુર્નામેન્ટમાં જોડાતા ભારતીય ટીમ વધુ મજબૂત બની છે. ગયા અઠવાડિયે ટોપ-5 માં સ્થાન મેળવ્યા બાદ દીક્ષા ડાગર હવે 'ઓર્ડર ઓફ મેરિટ' ના ટોપ-10 માં પહોંચી ગઈ છે, જેનાથી તેનો આત્મવિશ્વાસ સાતમા આસમાને છે.
વિશ્વના દિગ્ગજો સાથે ટક્કર
ભારતીય ખેલાડીઓનો મુકાબલો વિશ્વના શ્રેષ્ઠ ગોલ્ફરો સામે થવાનો છે. એડિલેડના મેદાનમાં હોમ ફેવરિટ અને વિશ્વની ચોથા નંબરની ખેલાડી મિંજી લી, વિશ્વની નવમા નંબરની હેન્ના ગ્રીન અને મેજર ચેમ્પિયન ગ્રેસ કિમ જેવા દિગ્ગજો પણ ટ્રોફી માટે દાવેદારી કરી રહ્યા છે. વર્ષ 2020 પછી પહેલીવાર એડિલેડ આ પ્રતિષ્ઠિત ટુર્નામેન્ટનું યજમાન બન્યું છે, જે ખેલાડીઓ માટે એક નવો પડકાર સાબિત થશે.
ઈનામી રકમ અને પડકારજનક કોર્સ
કુલ 144 ખેલાડીઓ વચ્ચે રમાનારી આ ટુર્નામેન્ટમાં 1.7 મિલિયન ઓસ્ટ્રેલિયન ડોલરનું તોતિંગ ઈનામ ભંડોળ રાખવામાં આવ્યું છે. કુયોંગા ગોલ્ફ ક્લબનો કોર્સ તેની મુશ્કેલ ડિઝાઇન માટે જાણીતો છે. સ્થાનિક ખેલાડી કેલ્સી બેનેટ અત્યારે ફોર્મમાં છે, પરંતુ ભારતીય ખેલાડીઓ પણ મેદાન મારવા માટે પૂરી રીતે સજ્જ છે. 2016 પછી પહેલીવાર LET શેડ્યૂલ પર પાછી ફરેલી આ ઓપનમાં ભારતીય ગોલ્ફરો નવો ઇતિહાસ રચવા આતુર છે.