ચેન્નાઈ:આઈપીએલ ૨૦૨૬ના આગમન સાથે જ ચેન્નાઈ સુપર કિંગ્સના દિગ્ગજ ખેલાડી મહેન્દ્ર સિંહ ધોની ફરી એકવાર ચર્ચામાં છે. સોશિયલ મીડિયા પર વાયરલ થયેલા એક વીડિયોમાં ૪૪ વર્ષીય ધોની અત્યંત એકાગ્રતા સાથે પોતાના બેટને ફિનિશિંગ ટચ આપતા અને ઘસીને તૈયાર કરતા જોવા મળી રહ્યા છે. કોઈપણ સ્પેશિયાલિસ્ટની મદદ લેવાને બદલે ખુદ ધોનીને પોતાના બેટના લાકડા પર કામ કરતા જોઈને ચાહકો તેમને 'ક્રાફ્ટમેન' કહીને નવાજી રહ્યા છે. આ દ્રશ્ય ધોનીની રમત પ્રત્યેની ગંભીરતા અને નાની-નાની બાબતો પરના તેમના ધ્યાનનું ઉત્તમ ઉદાહરણ પૂરું પાડે છે, જેણે આઈપીએલની શરૂઆત પહેલા જ ચાહકોમાં ભારે ઉત્સાહ ભરી દીધો છે.

IPL ૨૦૨૬માં પોતાની પાંચમી ટ્રોફી જીત્યા બાદ છઠ્ઠા ખિતાબ માટે સજ્જ ચેન્નઈ સુપર કિંગ્સે ફેન્સ માટે એક ખાસ ભેટ આપી છે. ટીમ દ્વારા 'ROAR-26' નામની એક મેગા ફેન ઈવેન્ટની જાહેરાત કરવામાં આવી છે, જે ૨૨ માર્ચે ચેપૉક સ્ટેડિયમમાં યોજાશે. આ કોઈ સામાન્ય કાર્યક્રમ નથી, પરંતુ ક્રિકેટ અને મનોરંજનનું અદભૂત મિશ્રણ છે. આ કાર્યક્રમમાં સુરેશ રૈના, મૅથ્યુ હેડન, મુરલી વિજય અને એસ. બદ્રીનાથ જેવા 'ઓરિજિનલ સુપર કિંગ્સ'ના દિગ્ગજો ફરી એકવાર ચેપૉક પર પરત ફરશે અને વર્તમાન ટીમ સાથે પ્રદર્શન મેચ રમતા જોવા મળશે.

આ ઈવેન્ટની ભવ્યતામાં ચાર ચાંદ લગાવવા માટે ઓસ્કાર વિજેતા સંગીતકાર એ.આર. રહમાન ખાસ લાઈવ પર્ફોર્મન્સ આપશે. રહમાનના સંગીત, લાઈટિંગ અને ક્રિકેટના દિગ્ગજોના મેળાપથી ચેપૉક સ્ટેડિયમ એક હાઈ-એનર્જી એરેનામાં ફેરવાઈ જશે. આ કાર્યક્રમ માત્ર ટીમની સફર અને ઈતિહાસને વાગોળવા માટે નથી, પરંતુ ફેન્સ માટે એક યાદગાર સાંજ બની રહે તે રીતે તૈયાર કરવામાં આવ્યો છે. ચેન્નઈ સુપર કિંગ્સ હંમેશા પોતાના ફેન્સ સાથેનો સંબંધ ગાઢ બનાવવા માટે જાણીતી છે, અને 'ROAR-26' એ દિશામાં લેવાયેલું એક અભૂતપૂર્વ પગલું છે.

આ ઈવેન્ટ માટે ટિકિટનું બુકિંગ આજથી જ શરૂ થઈ ગયું છે. ચાહકો સત્તાવાર ચેન્નાઈ સુપર કિંગ્સની એપ, વેબસાઈટ અથવા 'District' એપ પરથી ટિકિટ બુક કરાવી શકે છે. ફ્રેન્ચાઈઝીએ ફેન્સને ચેતવણી પણ આપી છે કે માત્ર અધિકૃત સ્ત્રોતો પાસેથી જ ટિકિટ ખરીદવી જેથી કરીને છેતરપિંડીથી બચી શકાય. ૨૮ માર્ચથી શરૂ થનારી IPL ૨૦૨૬ પહેલા આ ઈવેન્ટ ચેન્નાઈના સમર્થકો માટે એક ઉત્સવ સમાન બની રહેશે. શું તમે આ ભવ્ય ઈવેન્ટમાં સામેલ થવા માટે ટિકિટ બુક કરી દીધી છે?