ટી20 વર્લ્ડ કપ 2026માં ભારતની ઐતિહાસિક જીતના હીરો રહેલા સ્ટાર ઓલરાઉન્ડર હાર્દિક પંડ્યા ફરી એકવાર ચર્ચામાં છે. મેદાન પર પોતાના પ્રદર્શનથી ધૂમ મચાવ્યા બાદ હવે હાર્દિક પોતાની નવી લક્ઝરી કારને લઈને સોશિયલ મીડિયા પર છવાયેલો છે. હાર્દિક પંડ્યાએ પોતાના કાર કલેક્શનમાં એક શાનદાર ફેરારીનો ઉમેરો કર્યો છે, જેની કિંમત જાણીને તમે પણ ચોંકી જશો.

હાર્દિક પંડ્યાએ હાલમાં જ Ferrari 12Cilindri ખરીદી છે. આ લક્ઝરી સુપરકારની કિંમત અંદાજે 10 કરોડ રૂપિયા જણાવવામાં આવી રહી છે. સોશિયલ મીડિયા પર વાયરલ થઈ રહેલા એક વીડિયોમાં હાર્દિક પંડ્યા કાળા રંગની આ આલીશાન કન્વર્ટિબલ ફેરારી ચલાવતો જોવા મળી રહ્યો છે. સૌથી વધુ ચર્ચા એ વાતની થઈ રહી છે કે આ વીડિયોમાં તેની સાથે માહિકા શર્મા પણ જોવા મળી રહી છે, જેના કારણે આ વીડિયો ઇન્ટરનેટ પર આગની જેમ ફેલાઈ રહ્યો છે.

ફેરારી 12Cilindri એ કંપનીની નવી V12 ગ્રાન્ડ ટૂરિંગ સુપરકાર છે. આ કાર માત્ર 2.9 સેકન્ડમાં 0 થી 100 કિલોમીટર પ્રતિ કલાકની ઝડપ પકડી શકે છે. તેની ટોપ સ્પીડ 340 થી 350 કિલોમીટર પ્રતિ કલાકની આસપાસ છે, જે તેને વિશ્વની સૌથી ઝડપી અને શક્તિશાળી કારોમાંની એક બનાવે છે.

હાર્દિક પંડ્યા પહેલેથી જ મોંઘી અને લક્ઝરી કારોનો શોખીન છે. તેના ગેરેજમાં રોલ્સ રોયસ ફેન્ટમ, લેમ્બોર્ગિની ઉરુસ, મર્સિડીઝ-એએમજી G63 અને રેન્જ રોવર વોગ જેવી અનેક કિંમતી ગાડીઓ પહેલેથી જ હાજર છે. હવે આ 10 કરોડની ફેરારી તેના કલેક્શનનું સૌથી મોંઘું રત્ન બની ગઈ છે.

ટી20 વર્લ્ડ કપ 2026માં ભારતે જ્યારે ટ્રોફી જીતી, ત્યારે હાર્દિકે બેટ અને બોલ બંનેથી અદભૂત પ્રદર્શન કર્યું હતું. આ જીત બાદ મળેલી આ ભવ્ય ભેટ અને વાયરલ વીડિયો હાલમાં ફેન્સમાં ચર્ચાનો વિષય બન્યો છે.