નવી દિલ્હી: ઈન્ડિયન પ્રીમિયર લીગ (IPL) 2026નો પ્રારંભ થાય તે પૂર્વે જ સનરાઈઝર્સ હૈદરાબાદ (SRH)ના કેમ્પમાંથી બોલરો માટે ચેતવણીરૂપ સમાચાર સામે આવ્યા છે. ટીમની ઈન્ટ્રા-સ્ક્વોડ (આંતરિક) પ્રેક્ટિસ મેચમાં ઓપનર અભિષેક શર્માએ વિસ્ફોટક બેટિંગ કરતા માત્ર ૪૨ બોલમાં ૯૪ રન ઝૂડી કાઢ્યા છે. તાજેતરમાં સંપન્ન થયેલા T20 વર્લ્ડ કપમાં શરૂઆતી સંઘર્ષ બાદ ફાઈનલમાં અડધી સદી ફટકારનાર આ ખેલાડી હવે આઈપીએલમાં પણ એ જ લય જાળવી રાખવા માટે આતુર દેખાઈ રહ્યો છે.
સદી ચૂકી ગયો પણ સ્કોર બોર્ડ હચમચાવી દીધું
અભિષેક શર્મા SRH-A ટીમ તરફથી રમતા સદીના આરે પહોંચ્યો હતો, પરંતુ બ્રાયડન કાર્સેની ઓવરમાં આઉટ થતા તે માત્ર ૬ રન માટે પોતાની સેન્ચુરી ચૂકી ગયો હતો. જોકે, તેની આ ઈનિંગની મદદથી તેની ટીમે ૨૪૦ રનનો વિશાળ સ્કોર ખડકી દીધો હતો. અભિષેકની આ આક્રમકતા જોઈને દિગ્ગજ ઓફ સ્પિનર રવિચંદ્રન અશ્વિને પણ ટિપ્પણી કરી હતી કે, અભિષેકે કદાચ તેની સદી આઈપીએલની મુખ્ય મેચો માટે બચાવી રાખી છે. ટીમમાં સામેલ નવા ખેલાડી સલિલ અરોરાએ પણ ૧૬ બોલમાં ૪૭ રન ફટકારી આક્રમક સાથ આપ્યો હતો.
વર્લ્ડ કપના સંઘર્ષ બાદ શાનદાર વાપસી
ઉલ્લેખનીય છે કે, T20 વર્લ્ડ કપ ૨૦૨૬ના ગ્રુપ સ્ટેજ દરમિયાન અભિષેક શર્માનું ફોર્મ ચિંતાનો વિષય હતું. તે સતત ત્રણ મેચમાં શૂન્ય રને આઉટ થયો હતો. જોકે, ઝિમ્બાબ્વે સામેની મેચ અને ત્યારબાદ સૌથી મહત્વની એવી વર્લ્ડ કપ ફાઈનલમાં ૨૧ બોલમાં ૫૨ રન બનાવી તેણે ટીમના વિજયમાં મોટું યોગદાન આપ્યું હતું. હવે તે જ આત્મવિશ્વાસ સાથે અભિષેક આઈપીએલના મેદાનમાં ઉતરવા માટે તૈયાર છે. તેની સાથે હેનરિક ક્લાસેને પણ ૩૧ બોલમાં ૪૯ રન બનાવી લયમાં હોવાના સંકેત આપ્યા છે.
ટીમ મેનેજમેન્ટની નજર ઓપનિંગ જોડી પર
સનરાઈઝર્સ હૈદરાબાદ માટે અભિષેક શર્મા અને ટ્રેવિસ હેડની જોડી હંમેશા મહત્વની રહી છે. પ્રેક્ટિસ મેચમાં કાર્યકારી કેપ્ટન ઈશાન કિશન ૧૮ રન બનાવી સસ્તમાં આઉટ થયો હતો, પરંતુ મધ્યમ ક્રમમાં ક્લાસેન અને ટોપ ઓર્ડરમાં અભિષેકના ફોર્મે મેનેજમેન્ટની ચિંતા હળવી કરી છે. આગામી દિવસોમાં જ્યારે આઈપીએલનો જંગ જામશે ત્યારે જોવાનું એ રહેશે કે કયો બોલર અભિષેકના આ તોફાનને રોકવામાં સફળ થાય છે.