રાજકોટ: વર્લ્ડ કપમાં ઐતિહાસિક વિજય મેળવ્યા બાદ હવે ટીમ ઈન્ડિયા પોતાની પ્રથમ દ્વિપક્ષીય T20 શ્રેણી માટે આયર્લેન્ડના પ્રવાસે જવાની છે. ક્રિકેટ આયર્લેન્ડ અને ભારતીય ક્રિકેટ બોર્ડ (BCCI) એ ગઈકાલે આ હાઈ-પ્રોફાઈલ શ્રેણીની સત્તાવાર જાહેરાત કરી છે. નિર્ધારિત કાર્યક્રમ મુજબ, ૨૬ અને ૨૮ જૂને ટીમ ઈન્ડિયા આયર્લેન્ડની ધરતી પર બે ટી20 મેચોની શ્રેણી રમશે. આ પ્રવાસ ભારત માટે વ્યૂહાત્મક રીતે મહત્વનો છે કારણ કે તે અફઘાનિસ્તાન સામેની હોમ સિરીઝ અને ઈંગ્લેન્ડ સામેના મોટા પ્રવાસની વચ્ચે યોજાઈ રહ્યો છે. ચેમ્પિયન બન્યા બાદ ભારતીય ખેલાડીઓનો આયર્લેન્ડમાં જેવો ક્રેઝ જોવા મળશે તે જોવો રસપ્રદ રહેશે.

ભારતીય ટીમનું આગામી વર્ષનું કેલેન્ડર અત્યંત વ્યસ્ત રહેવાનું છે. IPL 2026 પૂર્ણ થયા બાદ તરત જ ૬ થી ૨૦ જૂન દરમિયાન ભારત ઘરઆંગણે અફઘાનિસ્તાન સામે એક ટેસ્ટ અને ત્રણ વન-ડે મેચોની યજમાની કરશે. આ શ્રેણી પૂરી થયાના ગણતરીના દિવસોમાં જ ટીમ આયર્લેન્ડ રવાના થશે અને ત્યાંથી સીધા ઈંગ્લેન્ડ પહોંચશે. ૧ થી ૧૯ જુલાઈ દરમિયાન ઈંગ્લેન્ડમાં પાંચ T20 અને ત્રણ વન-ડે મેચો રમાશે. ૨૦૨૭ના વન-ડે વર્લ્ડ કપને ધ્યાનમાં રાખીને ક્રિકેટ બોર્ડ અત્યારથી જ ખેલાડીઓને પૂરતી પ્રેક્ટિસ મળે તે હેતુથી વધુ વન-ડે શ્રેણીઓ ગોઠવવા માટે અન્ય દેશોના બોર્ડ સાથે સતત સંપર્કમાં છે.

બીજી તરફ, ક્રિકેટ આયર્લેન્ડ એશિયા કપની સફળતાથી પ્રેરિત થઈને યુરોપમાં ક્રિકેટના પ્રસાર માટે 'યુરો નેશન્સ કપ' લૉન્ચ કરવાની તૈયારી કરી રહ્યું છે. આ ટુર્નામેન્ટમાં ઈંગ્લેન્ડ, આયર્લેન્ડ, સ્કોટલેન્ડ, નેધરલેન્ડ્સ અને ઈટાલી જેવી ટીમો વચ્ચે T20 ફોર્મેટમાં મેન્સ અને વિમેન્સ કેટેગરીમાં મુકાબલા યોજાઈ શકે છે. વર્ષ ૨૦૨૭માં આ ટુર્નામેન્ટનો પ્રારંભ થાય તે માટે આયર્લેન્ડના અધિકારીઓ યુરોપિયન ટીમો સાથે અત્યારે ગંભીર ચર્ચા કરી રહ્યા છે. જો આ ટુર્નામેન્ટ સફળ રહેશે તો યુરોપમાં ક્રિકેટનો એક નવો યુગ શરૂ થશે અને નાની ટીમોને મોટી ટીમો સામે રમવાની વધુ તકો સાંપડશે.

આયર્લેન્ડ ક્રિકેટ બોર્ડે એક માનવીય અભિગમ અપનાવતા અફઘાની મહિલા ક્રિકેટ ટીમને પણ પોતાની ધરતી પર રમવા માટે આમંત્રણ પાઠવ્યું છે. તાલિબાન શાસનની વાપસી બાદ દેશ છોડીને ભાગી ગયેલી અફઘાની મહિલા ખેલાડીઓ લાંબા સમયથી આંતરરાષ્ટ્રીય ક્રિકેટથી વંચિત છે. ઓગસ્ટ ૨૦૨૬માં જ્યારે અફઘાનિસ્તાનની મેન્સ ટીમ આયર્લેન્ડમાં પાંચ વન-ડે રમવા જશે, ત્યારે જ વિમેન્સ ટીમ માટે પણ મેચો ગોઠવવાનું આયોજન છે. જોકે, તાલિબાન સરકારના મહિલાઓ પ્રત્યેના વલણને કારણે આ શેડ્યૂલ હજુ અનિશ્ચિત છે. હાલમાં આ મહિલા ખેલાડીઓ ઓસ્ટ્રેલિયા જેવા દેશોની સહાયથી પોતાનું અસ્તિત્વ ટકાવી રહી છે અને આંતરરાષ્ટ્રીય મંચ પર પુનરાગમન કરવા માટે આતુર છે.