મુંબઈ: આઈપીએલની ૧૯મી સીઝનનું બ્યુગલ વાગવાને હવે ગણતરીના દિવસો જ બાકી છે, ત્યારે મુંબઈ ઈન્ડિયન્સના કેમ્પમાં કેપ્ટનશીપને લઈને ફરી એકવાર વિવાદોનું વાવાઝોડું ફૂંકાયું છે. ભૂતપૂર્વ મુખ્ય પસંદગીકાર કૃષ્ણમાચારી શ્રીકાંતે એક એવો બોમ્બ ફોડ્યો છે જેણે હાર્દિક પંડ્યાના સમર્થકોને ચોંકાવી દીધા છે. શ્રીકાંતનું માનવું છે કે હાર્દિકે હવે કેપ્ટનશીપનો મોહ છોડીને ટીમની કમાન સૂર્યકુમાર યાદવને સોંપી દેવી જોઈએ. ખાસ કરીને ૨૦૨૬ના ટી૨૦ વર્લ્ડ કપમાં ભારતને ચેમ્પિયન બનાવ્યા બાદ સૂર્યાનો દાવો મજબૂત બન્યો છે અને ટીમમાં તેની લોકપ્રિયતા પણ આસમાને છે.

હાર્દિક પંડ્યા માટે મુંબઈમાં પાછા ફરવાનો નિર્ણય અત્યાર સુધી કાંટાની સેજ સાબિત થયો છે. ૨૦૨૪માં ટીમ છેલ્લે રહી અને ૨૦૨૫માં ચોથા સ્થાને પહોંચી, પરંતુ ટ્રોફી હજુ પણ મુંબઈથી દૂર છે. બીજી તરફ, રોહિત શર્મા જેવા દિગ્ગજની હાજરીમાં હાર્દિક પર સતત દબાણ વધી રહ્યું છે. શ્રીકાંતે દલીલ કરી છે કે જ્યારે તમારી ટીમમાં સૂર્યા જેવો વર્લ્ડ કપ વિજેતા કેપ્ટન અને રોહિત જેવો પાંચ વખતનો આઈપીએલ વિજેતા કેપ્ટન હોય, ત્યારે હાર્દિકે પોતે જ આગળ આવીને નેતૃત્વ પરિવર્તનની દરખાસ્ત મૂકવી જોઈએ. આનાથી ટીમમાં જૂથવાદ ખતમ થશે અને મેદાન પર ખેલાડીઓ વધુ મુક્ત રીતે રમી શકશે.

મુંબઈ ઈન્ડિયન્સની નવી સિઝન ૨૯ માર્ચે KKR સામે શરૂ થવાની છે, પરંતુ તે પહેલા પ્રેક્ટિસ સેશન અને ડ્રેસિંગ રૂમમાં વાતાવરણ કેવું હશે તે જોવું રસપ્રદ રહેશે. ટીમમાં રોહિત, બુમરાહ, બોલ્ટ અને ડી કોક જેવા દિગ્ગજો છે, જે કોઈ પણ કેપ્ટન માટે શક્તિ અને પડકાર બંને છે. હાર્દિક પર ૨૭ કરોડની મોટી કિંમત અને કેપ્ટનશીપનો બેવડો બોજ છે, ત્યારે શું તે સૂર્યાને 'સેલ્યુટ' કરીને પદ છોડશે કે પછી ફરી એકવાર ટીકાઓનો સામનો કરીને મેદાનમાં ઉતરશે? MI મેનેજમેન્ટનો એક નિર્ણય આ આખી સીઝનનું ભવિષ્ય નક્કી કરશે.