બેંગલુરુ:ઈન્ડિયન પ્રીમિયર લીગ (IPL) ૨૦૨૬ની શાનદાર શરૂઆત થઈ ચૂકી છે. બેંગલુરુના એમ. ચિન્નાસ્વામી સ્ટેડિયમ ખાતે રમાયેલા સીઝનના પ્રથમ મુકાબલામાં ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB) એ સનરાઈઝર્સ હૈદરાબાદ (SRH) ને હરાવીને જીત સાથે પ્રારંભ કર્યો છે. આ મેચમાં સ્ટાર બેટ્સમેન વિરાટ કોહલીએ ૬૯ રનની શાનદાર ઇનિંગ રમીને આરસીબીને સિઝનની પ્રથમ સફળતા અપાવવામાં મહત્વની ભૂમિકા ભજવી હતી. આરસીબી આ વખતે સતત બીજું ટાઇટલ જીતવાના ઈરાદા સાથે મેદાનમાં ઉતરી છે.

પેટ કમિન્સની ગેરહાજરી અને ઈશાન કિશનનું નેતૃત્વ:
સનરાઈઝર્સ હૈદરાબાદ માટે આ સીઝનની શરૂઆત પડકારજનક રહી છે કારણ કે તેમના નિયમિત કેપ્ટન પેટ કમિન્સ પીઠની ઈજાના કારણે શરૂઆતની કેટલીક મેચો ગુમાવી રહ્યા છે. તેમની ગેરહાજરીમાં ટીમ મેનેજમેન્ટે યુવા ખેલાડી ઈશાન કિશનને કાર્યકારી કેપ્ટન તરીકેની જવાબદારી સોંપી છે. હૈદરાબાદના હેડ કોચ ડેનિયલ વેટોરીએ ઈશાનની ક્ષમતા પર ભરોસો મુકતા જણાવ્યું હતું કે, ઈશાન પાસે આઈપીએલનો બહોળો અનુભવ છે અને તેણે સ્થાનિક ક્રિકેટમાં સૈયદ મુશ્તાક અલી ટ્રોફી જીતાડીને પોતાની નેતૃત્વ શક્તિ સાબિત કરી છે.

અભિષેક અને ઈશાનની જોડી પર દરોમદાર:
ડેનિયલ વેટોરીએ મેચ પૂર્વેની પત્રકાર પરિષદમાં જણાવ્યું હતું કે, ઈશાન કિશન અને અભિષેક શર્મા વચ્ચેનું સંયોજન ટીમ માટે ફાયદાકારક રહેશે. ઈશાનની એનર્જી અને અનુભવ ટીમને નવી ઊંચાઈ પર લઈ જશે. જોકે, પેટ કમિન્સની ખોટ ટીમમાં વર્તાઈ રહી છે. કમિન્સની ફિટનેસ અંગે વેટોરીએ આશા વ્યક્ત કરી હતી કે આગામી ૧૦ થી ૧૨ દિવસમાં તે સંપૂર્ણ ફિટ થઈને ટીમમાં પરત ફરી શકે છે. ક્રિકેટ ઓસ્ટ્રેલિયા તરફથી તેને બોલિંગ લોડ વધારવાની મંજૂરી મળ્યા બાદ હાલ તે પોતાની સ્ટ્રેન્થ પર કામ કરી રહ્યો છે.

આક્રમક બેટિંગ અને પડકારજનક પીચો:
એસઆરએચ પાસે અભિષેક શર્મા, ટ્રેવિસ હેડ, ઈશાન કિશન અને હેનરિક ક્લાસેન જેવા વિસ્ફોટક બેટ્સમેનો છે, જે ૧૦ રન પ્રતિ ઓવરની ઝડપથી સ્કોર કરવાની ક્ષમતા ધરાવે છે. વેટોરીના મતે, આ બેટિંગ લાઈનઅપ કોઈ પણ વિરોધી ટીમ માટે જોખમી સાબિત થઈ શકે તેમ છે. જોકે, પડકારજનક અને ધીમી પીચો પર આ બેટ્સમેનો કેવી રીતે અનુકૂલન સાધે છે તે જોવું રસપ્રદ રહેશે. આઈપીએલ ૨૦૨૬માં તમામ ટીમો ભારતીય કેપ્ટનો સાથે મેદાનમાં ઉતરી રહી છે, જે એક વિશિષ્ટ સંયોગ છે.