મુંબઈ: ઇન્ડિયન પ્રીમિયર લીગ (IPL) 2026 ની નવી સીઝન શરૂ થાય તે પૂર્વે જ ક્રિકેટ જગતમાં રોમાંચની લહેર જોવા મળી રહી છે. સત્તાવાર બ્રોડકાસ્ટર સ્ટાર સ્પોર્ટ્સ દ્વારા ગઈકાલે કોમેન્ટરી પેનલના સભ્યોના નામની જાહેરાત કરવામાં આવતા અનેક મોટા આશ્ચર્યો સામે આવ્યા છે. આ વખતે 12 અલગ-અલગ ભાષાઓમાં 160 થી વધુ કોમેન્ટેટર્સ આઈપીએલનો રોમાંચ વધારતા જોવા મળશે. જોકે, આ યાદીમાં જાણીતા કોમેન્ટેટર જતીન સપ્રુનું નામ ગાયબ હોવાથી સોશિયલ મીડિયા પર ફેન્સમાં ભારે ચર્ચા જાગી છે અને બ્રોડકાસ્ટરના આ નિર્ણય પર અનેક સવાલો ઉઠી રહ્યા છે.

ક્રિકેટના મેદાનમાં પોતાની ફિરકીથી બેટ્સમેનોને નચાવનાર અને હાલમાં જ નિવૃત્તિ જાહેર કરનાર રવિચન્દ્રન અશ્વિન હવે માઇક પકડીને ચાહકોનું મનોરંજન કરશે. અશ્વિન હિન્દી કોમેન્ટરી પેનલનો મહત્વનો હિસ્સો બન્યો છે, જ્યાં તેની સાથે સુનીલ ગાવસ્કર, નવજોત સિંહ સિદ્ધુ અને વીરેન્દ્ર સેહવાગ જેવા દિગ્ગજો જોવા મળશે. આ યાદીમાં અનિલ કુંબલે, ચેતેશ્વર પુજારા, આકાશ ચોપડા અને ઇરફાન પઠાણ જેવા અનુભવીઓ સાથે આદિત્ય તારે અને ઉમેશ યાદવના નામનો પણ ઉમેરો કરવામાં આવ્યો છે, જે દર્શાવે છે કે આ વખતે કોમેન્ટરી બોક્સમાં વિશ્લેષણ અને મનોરંજનનો શાનદાર તડકો લાગશે.

આંતરરાષ્ટ્રીય સ્તરના ખેલાડીઓની વાત કરીએ તો સાઉથ આફ્રિકાના પૂર્વ કેપ્ટન ફાફ ડુ પ્લેસી આ વખતે અલગ ભૂમિકામાં જોવા મળશે. ફાફ આ વર્ષે પાકિસ્તાન સુપર લીગ (PSL) માં રમવાનો હતો, પરંતુ કમનસીબે ઇજાના કારણે તેનો આ પ્લાન રદ થયો છે. છેલ્લી સીઝનમાં દિલ્હી કેપિટલ્સ માટે શાનદાર પ્રદર્શન કરનાર ફાફ હવે કોમેન્ટરી બોક્સમાં બેસીને મેચનું વિશ્લેષણ કરતો નજરે પડશે. તેની સાથે જ ઇંગ્લેન્ડના પૂર્વ ખેલાડી કેવિન પીટરસન પણ આ પેનલમાં જોડાયા છે, જેમના તીખા અને સચોટ વિશ્લેષણની હંમેશા રાહ જોવામાં આવે છે.

બીજી તરફ, દિલ્હી કેપિટલ્સની મેન્ટરશિપ છોડનાર કેવિન પીટરસને અગાઉ પૂરતો સમય નથી તેમ કહીને જવાબદારી નકારી હતી, પરંતુ હવે તેઓ પૂરી સીઝન માટે કોમેન્ટરી કરતા જોવા મળશે. સ્ટાર સ્પોર્ટ્સ દ્વારા કરવામાં આવેલા આ મોટા ફેરફારોથી સ્પષ્ટ થાય છે કે બ્રોડકાસ્ટર આ વખતે દર્શકોને મેદાનના એક્શનની સાથે સાથે પડદા પાછળના રોચક કિસ્સાઓ અને ટેકનિકલ પાસાઓથી પણ વાકેફ કરવા માંગે છે. હવે જોવાનું એ રહેશે કે મેદાન પરના આ સુપરસ્ટાર્સ માઇક પર કેવો કમાલ બતાવે છે અને જતીન સપ્રુની ગેરહાજરીમાં શોનું સંચાલન કોણ સંભાળે છે.