બેંગ્લોર: ક્રિકેટ જગતના 'રન મશીન' વિરાટ કોહલીએ IPL 2026 ના પ્રારંભિક મુકાબલામાં જ બેટ વડે તોફાન મચાવીને પાકિસ્તાની દિગ્ગજ શોએબ મલિકના વર્ષો જૂના રેકોર્ડને ધરાશાયી કરી દીધો છે. એમ. ચિન્નાસ્વામી સ્ટેડિયમ ખાતે સનરાઇઝર્સ હૈદરાબાદ સામે રમાયેલી રોમાંચક મેચમાં કોહલીએ માત્ર ૪૧૫મી મેચમાં ૧૩,૬૧૨ રનનો આંકડો પાર કરીને એશિયામાં સૌથી વધુ T20 રન બનાવનાર બેટ્સમેન બનવાનું ગૌરવ પ્રાપ્ત કર્યું છે. આ પૂર્વે પાકિસ્તાનના શોએબ મલિકે ૫૫૭ મેચોમાં ૧૩,૫૭૧ રન બનાવ્યા હતા, પરંતુ કોહલીએ ખૂબ જ ઓછી ઇનિંગ્સમાં આ માઈલસ્ટોન સર કરીને પોતાની ક્ષમતા સાબિત કરી દીધી છે. આ સાથે જ કોહલી હવે વિશ્વમાં સૌથી વધુ T20 રન બનાવનારા બેટ્સમેનોની યાદીમાં છઠ્ઠા સ્થાને પહોંચી ગયો છે, જ્યાં ક્રિસ ગેલ ૧૪,૫૬૨ રન સાથે ટોચ પર છે.

સનરાઇઝર્સ હૈદરાબાદ સામે વિરાટ કોહલીનું બેટ હંમેશા આગ ઓકતું રહ્યું છે અને આ મેચમાં પણ તેણે ૬૯ રનની અણનમ ઇનિંગ રમીને પોતાની સર્વોપરિતા જાળવી રાખી છે. IPL ના ઇતિહાસમાં હૈદરાબાદ સામે સાત વખત ૫૦ થી વધુ રન બનાવનારો તે એકમાત્ર બેટ્સમેન બન્યો છે, જેની સાથે તેણે ફાફ ડુ પ્લેસિસ અને સંજુ સેમસન જેવા દિગ્ગજોને પાછળ છોડી દીધા છે. આટલું જ નહીં, હૈદરાબાદ સામે તેના કુલ ૮૭૪ રન છે, જે કોઈપણ એક ટીમ સામે આ લીગમાં સૌથી વધુ વ્યક્તિગત રનનો રેકોર્ડ છે. કોહલીએ લક્ષ્યનો પીછો કરતી વખતે પણ અનેક વિક્રમો નોંધાવ્યા છે, જેમાં ફાફ ડુ પ્લેસિસ સાથેની તેની જોડીએ ૫૮.૬૬ ની સરેરાશથી રન બનાવીને ટીમને મજબૂતી આપી છે.

રેકોર્ડ્સની હારમાળા અહીં જ નથી અટકતી, વિરાટ કોહલીએ IPL માં ઓપનર તરીકે સૌથી વધુ ૧૮૨ છગ્ગા ફટકારીને કેએલ રાહુલ (૧૭૯) અને શિખર ધવન (૧૪૩) ને પાછળ પાડી દીધા છે. ઓપનિંગ બેટ્સમેન તરીકે ૧૩૯.૬૨ ના શાનદાર સ્ટ્રાઈક રેટ અને ૮ સદી સાથે તેણે ૫૦૭૮ રન બનાવીને પોતાની ઇનિંગ્સને એક નવી ઊંચાઈ આપી છે. જે રીતે કોહલીએ સીઝનની શરૂઆત કરી છે, તે જોતા ક્રિકેટ વિશ્લેષકો માની રહ્યા છે કે આ વર્ષે તે ક્રિસ ગેલ અને પોલાર્ડના સર્વકાલીન રેકોર્ડ્સને પણ પડકાર આપી શકે છે. કિંગ કોહલીના આ વિરાટ પરાક્રમથી બેંગ્લોરના ચાહકોમાં ખુશીનો માહોલ છે અને સોશિયલ મીડિયા પર 'એશિયાનો કિંગ' ટ્રેન્ડ થઈ રહ્યો છે.