નવી દિલ્હી: શ્રીલંકા ક્રિકેટ (SLC) એ ફાસ્ટ બોલર નુવાન તુષારાને ઇન્ડિયન પ્રીમિયર લીગ (IPL) 2026 માં ભાગ લેવા માટે 'નો ઓબ્જેક્શન સર્ટિફિકેટ' (NOC) આપવાનો ઇનકાર કર્યો હતો, જેના પગલે તુષારાએ કોલંબો ડિસ્ટ્રિક્ટ કોર્ટમાં કાનૂની હસ્તક્ષેપ માટે અરજી દાખલ કરી હતી. શ્રીલંકાના ફાસ્ટ બોલરનો IPL 2026 માટે રોયલ ચેલેન્જર્સ બેંગ્લોર (RCB) સાથે કરાર હતો. તેણે અગાઉ બોર્ડની મંજૂરીથી અગાઉની બે સીઝનમાં ટુર્નામેન્ટમાં ભાગ લીધો હતો. જોકે, ન્યૂઝ વાયર શ્રીલંકાના એક અહેવાલ મુજબ, SLC એ આ વખતે તેમને NOC આપવાનો ઇનકાર કર્યો છે. બોર્ડે જણાવ્યું હતું કે તુષારા જરૂરી ફિટનેસ ધોરણોને પૂર્ણ કરવામાં નિષ્ફળ ગયો છે. ગુરુવારે આ મામલાની સુનાવણી થઈ હતી, કોર્ટે આગામી સુનાવણી માટે 9 એપ્રિલની તારીખ નક્કી કરી હતી. તુષારાએ પોતાની અરજીમાં SLC પ્રમુખ શમ્મી સિલ્વા, સેક્રેટરી બંદુલા દિસાનાયકે, ટ્રેઝરર સુજીવા ગોડાલિયાદ્દા અને CEO એશ્લે ડી સિલ્વાને પ્રતિવાદી તરીકે નામ આપ્યા છે.તુષારાએ આ નિર્ણયનો વિરોધ કરતા કહ્યું છે કે બોર્ડ સાથેનો તેમનો કેન્દ્રીય કરાર 31 માર્ચ, 2026 ના રોજ સમાપ્ત થઈ રહ્યો છે, અને તેમણે બોર્ડને પહેલેથી જ જાણ કરી દીધી હતી કે તેઓ તેને લંબાવવા માંગતા નથી. તેમણે દાવો કર્યો હતો કે તેમને હવે રાષ્ટ્રીય ટીમ પસંદગી યોજનાઓમાંથી લગભગ બાકાત રાખવામાં આવ્યા છે. પરિણામે, ફિટનેસના આધારે બોર્ડનો અભિગમ વાહિયાત અને ખોટો છે.પોતાની અરજીમાં, બોલરે જણાવ્યું છે કે તેમનું ફિટનેસ સ્તર આજે પણ પાછલા વર્ષો જેટલું જ છે. તે વર્ષો દરમિયાન, તેમને IPL સહિત અનેક વિદેશી લીગમાં રમવા માટે NOC આપવામાં આવ્યા હતા. તુષારા દલીલ કરે છે કે તેમને NOC ન આપવો એ સંપૂર્ણપણે ગેરવાજબી છે, ખાસ કરીને જ્યારે તેમની શારીરિક સ્થિતિ યથાવત રહી છે.