નવી દિલ્હી: તા.૩ ભારતીય મહિલા ટેનિસ ટીમ ફરી એકવાર વૈશ્વિક સ્તરે ભારતનો ધ્વજ લહેરાવવા માટે સજ્જ થઈ ગઈ છે. ગત વર્ષે શાનદાર પ્રદર્શન કરી વર્લ્ડ ગ્રુપ પ્લેઓફમાં સ્થાન મેળવ્યા બાદ, હવે ભારતીય ટીમ ૭ એપ્રિલથી શરૂ થનારા ‘બિલી જીન કિંગ (BJK) કપ એશિયા/ઓશેનિયા ગ્રુપ-૧’ માં પોતાની જીતનું પુનરાવર્તન કરવાના લક્ષ્ય સાથે મેદાનમાં ઉતરશે. આ મહત્વપૂર્ણ ટુર્નામેન્ટ માટે દિલ્હીના પ્રતિષ્ઠિત દિલ્હી લોન ટેનિસ એસોસિએશન (DLTA) સ્ટેડિયમ ખાતે તૈયારીઓ પૂરજોશમાં ચાલી રહી છે.
પ્રેક્ટિસ સત્રમાં ખેલાડીઓનો જોશ
ગુરુવારે સવારે ભારતીય ટીમે પોતાનું પ્રથમ તાલીમ સત્ર યોજ્યું હતું. ટીમના કેપ્ટન વિશાલ ઉપ્પલના માર્ગદર્શન હેઠળ અંકિતા રૈના, સહજા યમલાપલ્લી, વૈષ્ણવી અડકર, શ્રીવલ્લી ભામિદીપતી, રુતુજા ભોસલે અને વૈદેહી ચૌધરીએ કલાકો સુધી પરસેવો પાડ્યો હતો. મેચો દિવસના બીજા ભાગમાં શરૂ થવાની હોવાથી અને ફ્લડલાઇટ્સમાં રમાવાની હોવાથી, આગામી દિવસોમાં ટીમ સાંજની તાલીમ પર વધુ ધ્યાન કેન્દ્રિત કરશે જેથી ખેલાડીઓ વાતાવરણ સાથે અનુકૂલન સાધી શકે.
ભારત સામે આ દેશોનો પડકાર
આ સ્પર્ધામાં ભારત ઉપરાંત ન્યુઝીલેન્ડ, ઇન્ડોનેશિયા, થાઇલેન્ડ, મંગોલિયા અને કોરિયા જેવી મજબૂત ટીમો ભાગ લઈ રહી છે. આ તમામ ટીમો વચ્ચે ખરાખરીનો જંગ જામશે, પરંતુ તેમાંથી માત્ર ટોચની બે ટીમો જ નવેમ્બરમાં યોજાનારા પ્લેઓફમાં પ્રવેશ મેળવી શકશે. ભારતીય ખેલાડીઓ જે લયમાં જોવા મળી રહ્યા છે તે જોતા ચાહકોને આશા છે કે ભારત સરળતાથી ક્વોલિફાય કરી શકશે.
ગત વર્ષનું શાનદાર પ્રદર્શન
ઉલ્લેખનીય છે કે ગયા વર્ષે પુણેમાં રમાયેલી મેચોમાં ભારતે હોંગકોંગ, તાઇવાન, થાઇલેન્ડ અને કોરિયા સામે ૨-૧ થી જીત મેળવીને શાનદાર દેખાવ કર્યો હતો. જોકે, પ્લેઓફમાં સ્લોવેનિયા અને નેધરલેન્ડ્સ સામે ભારતને હારનો સામનો કરવો પડ્યો હતો. આ વખતે ટીમ પોતાની જૂની ભૂલો સુધારીને પ્લેઓફથી આગળ વધવા માટે મક્કમ છે. ઘરેલું મેદાન અને પ્રેક્ષકોનો ટેકો ભારતીય ખેલાડીઓ માટે ‘બૂસ્ટર ડોઝ’ સમાન સાબિત થશે.