મુંબઈ: ઇન્ડિયન પ્રીમિયર લીગ (આઇપીએલ) ૨૦૨૬ માં આજે રવિવારના દિવસે ક્રિકેટ ચાહકોને બે રોમાંચક અને હાઈ-વોલ્ટેજ મેચ જોવા મળશે, જેમાં ચાર મજબૂત ટીમો મેદાનમાં ઉતરીને ટ્રોફી માટે સંઘર્ષ કરશે.

આઇપીએલ ૨૦૨૬ ની ક્રિકેટ સિઝન તેના પૂરા રોમાંચ પર ચાલી રહી છે. આજે ટુર્નામેન્ટમાં ડબલ હેડર એટલે કે એક જ દિવસમાં બે મોટી મેચ રમાવાની છે. બપોરના ૩:૩૦ કલાકે ભારતીય સમય મુજબ પ્રથમ મેચ રાજીવ ગાંધી ઇન્ટરનેશનલ સ્ટેડિયમ, હૈદરાબાદ ખાતે રમાશે. આ મેચમાં સ્થાનિક ટીમ સનરાઇઝર્સ હૈદરાબાદ અને લખનઉ સુપર જાયન્ટ્સની ટીમો એકબીજા સામે ટકરાશે. ત્યારબાદ સાંજે ૭:૩૦ કલાકે બેંગલુરુના એમ. ચિન્નાસ્વામી સ્ટેડિયમમાં દિવસની બીજી મેચ શરૂ થશે. 

આ મેચ ક્રિકેટ જગતના બે સૌથી લોકપ્રિય અને મોટા સ્ટાર્સની ટીમો વચ્ચે છે - રોયલ ચેલેન્જર્સ બેંગલુરુ (આરસીબી) અને ચેન્નઈ સુપર કિંગ્સ (સીએસકે). 

બેંગલુરુના બેટિંગ ફ્રેન્ડલી પીચ પર રમાનારી આ મેચમાં બંને ટીમના વિસ્ફોટક બેટ્સમેનો દ્વારા ચોગ્ગા અને છગ્ગાનો વરસાદ થવાની પૂરી સંભાવના છે. ક્રિકેટ ચાહકો આ બંને મેચની આતુરતાથી રાહ જોઈ રહ્યા છે અને આખા દેશમાં આઇપીએલનો જબરદસ્ત ક્રેઝ જોવા મળી રહ્યો છે.*