નવી દિલ્હી : ઇન્ડિયન પ્રીમિયર લીગ (IPL) 2026ની સીઝન જેમ-જેમ આગળ વધી રહી છે, તેમ-તેમ મેદાન પર રસાકસી વધી રહી છે. માત્ર રન જ નહીં, પણ વિકેટ લેવાની બાબતમાં પણ બોલરો વચ્ચે હવે 'પર્પલ કેપ' માટે તીવ્ર સ્પર્ધા જોવા મળી રહી છે. આજે 5 એપ્રિલ સુધીના અપડેટ મુજબ, રાજસ્થાન રોયલ્સનો સ્ટાર લેગ સ્પિનર રવિ બિશ્નોઈ અને પંજાબ કિંગ્સનો વિજયકુમાર વૈશાખ સંયુક્ત રીતે આ રેસમાં ટોચ પર બિરાજમાન છે.
બિશ્નોઈની ઘાતક બોલિંગ:
ગુજરાત ટાઇટન્સ સામેની છેલ્લી મેચમાં રવિ બિશ્નોઈએ પોતાની સ્પિનના જાદુમાં વિરોધી ટીમના બેટર્સને ફસાવ્યા હતા. તેણે શાનદાર બોલિંગ કરતા 4 વિકેટ ઝડપીને પર્પલ કેપની રેસમાં સીધી નંબર-1 પર એન્ટ્રી કરી છે. હાલમાં બિશ્નોઈ 2 મેચમાં 5 વિકેટ સાથે યાદીમાં મોખરે છે. તેની સાથે પંજાબનો વિજયકુમાર વૈશાખ પણ 5 વિકેટ સાથે તેને બરાબરની ટક્કર આપી રહ્યો છે.
ટોપ-10માં યુવા ભારતીયોનો દબદબો:
આ વખતની સીઝનમાં ખાસ વાત એ છે કે પર્પલ કેપની રેસમાં અનુભવી બોલરોની સાથે યુવા ભારતીય બોલરો છવાયેલા છે. ટી. નટરાજન, જયદેવ ઉનડકટ, પ્રસિદ્ધ કૃષ્ણા અને અંશુલ કમ્બોજ જેવા ખેલાડીઓ 4-4 વિકેટ લઈને ટોપ-10માં યથાવત છે.
પર્પલ કેપની રેસમાં ટોચના બોલરો (5 એપ્રિલ સુધી):
| ખેલાડી | ટીમ | મેચ | વિકેટ |
|---|---|---|---|
| રવિ બિશ્નોઈ | RR | 2 | 5 |
| વિજયકુમાર વૈશાખ | PBKS | 2 | 5 |
| ટી. નટરાજન | DC | 2 | 4 |
| લુંગી એનગિડી | DC | 2 | 4 |
| જયદેવ ઉનડકટ | SRH | 2 | 4 |