નિંગબો : બેડમિન્ટન એશિયા ચેમ્પિયનશિપના પ્રથમ દિવસે ભારતીય શટલરો માટે રમત ઉતાર-ચઢાવવાળી રહી હતી. ઓલિમ્પિક મેડલ વિજેતા પીવી સિંધુ અને અનુભવી એચ.એસ. પ્રણોયે પોતાના અનુભવનો ઉપયોગ કરીને બીજા રાઉન્ડમાં જગ્યા બનાવી લીધી છે, પરંતુ ભારતની મોટી આશા ગણાતા લક્ષ્ય સેન અને કિદામ્બી શ્રીકાંત પ્રથમ રાઉન્ડમાં જ બહાર થઈ જતાં ભારતને મોટો આંચકો લાગ્યો છે.
પીવી સિંધુનો સંઘર્ષમય વિજય
ભારતની સ્ટાર શટલર પીવી સિંધુની મલેશિયાની વોંગ લિંગ ચિંગ સામે આકરી કસોટી થઈ હતી. પ્રથમ ગેમ ૧૫-૨૧ થી હાર્યા બાદ સિંધુએ જોરદાર વાપસી કરી હતી અને બીજી ગેમ ૨૧-૧૧ થી જીતી લીધી હતી. નિર્ણાયક ગેમમાં બંને ખેલાડીઓ ૧૯-૧૯ ના સ્કોર પર બરાબરી પર હતા, પરંતુ અંતિમ ક્ષણોમાં સિંધુએ ધૈર્ય જાળવી રાખીને સતત બે પોઈન્ટ મેળવી ૨૧-૧૯ થી મેચ પોતાના નામે કરી હતી. હવે બીજા રાઉન્ડમાં તેની ટક્કર ચીનની વાંગ ઝી યી સામે થશે.
લક્ષ્ય સેન અને શ્રીકાંતની આંચકાજનક હાર
તાજેતરમાં ઓલ ઈંગ્લેન્ડ ચેમ્પિયનશિપમાં શાનદાર પ્રદર્શન કરનાર લક્ષ્ય સેન હોંગકોંગના લી ચેઉક યિયુ સામે ૧૨-૨૧, ૧૯-૨૧ થી સીધી ગેમમાં હારી ગયો હતો. બીજી તરફ, કિદામ્બી શ્રીકાંતે સિંગાપોરના લોહ કીન યુ સામે પ્રથમ ગેમ ૨૧-૧૮ થી જીતીને સારી શરૂઆત કરી હતી, પરંતુ ત્યારબાદ તે લય જાળવી શક્યો નહોતો અને બાકીની બે ગેમ ૯-૨૧, ૧૧-૨૧ થી હારીને ટુર્નામેન્ટમાંથી બહાર ફેંકાઈ ગયો હતો.
આયુષ શેટ્ટીનો મોટો ઉલટફેર
ભારત માટે દિવસના સૌથી આશ્ચર્યજનક અને ખુશીના સમાચાર આયુષ શેટ્ટીએ આપ્યા હતા. યુવા ખેલાડી આયુષે અદભૂત રમતનું પ્રદર્શન કરતા વિશ્વના ૭માં નંબરના ખેલાડી ચીનના લી શી ફેંગને સીધી ગેમમાં પરાજય આપીને પ્રી-ક્વાર્ટર ફાઇનલમાં પ્રવેશ કર્યો હતો. તેની આ જીતે ભારતીય છાવણીમાં નવો જોશ ભરી દીધો છે. હવે તે તાઈપેઈના ચી યુ જેન સામે ટકરાશે.
પ્રણોયની આગેકૂચ અને મહિલા સિંગલ્સમાં નિરાશા
એચ.એસ. પ્રણોયે પણ વિયેતનામના ખેલાડી સામે ૨૪-૨૨, ૨૧-૧૨ થી વિજય મેળવીને પોતાની આગેકૂચ જાળવી રાખી છે. જોકે, મહિલા સિંગલ્સમાં માલવિકા બંસોડ અને તન્વી શર્મા પોતપોતાની મેચો હારી જતાં તેમનું અભિયાન સમાપ્ત થઈ ગયું છે. હવે બીજા રાઉન્ડમાં સિંધુ, પ્રણોય અને આયુષ પર ભારતને મેડલ અપાવવાની મોટી જવાબદારી રહેશે.