મુંબઈ:આઈપીએલ 2026 માં મુંબઈ ઈન્ડિયન્સની મુશ્કેલીઓ ઓછી થવાનું નામ નથી લઈ રહી. વાનખેડે સ્ટેડિયમમાં રમાયેલા મુકાબલામાં રોયલ ચેલેન્જર્સ બેંગલુરુએ મુંબઈ ઈન્ડિયન્સને 18 રને પરાજય આપ્યો છે. મુંબઈના બોલરો આરસીબીના બેટ્સમેનોના આક્રમણને રોકવામાં નિષ્ફળ રહ્યા હતા, જેના પરિણામે મુંબઈ ઈન્ડિયન્સે સિઝનની સતત ત્રીજી હારનો સામનો કરવો પડ્યો છે.

આરસીબીના ટોપ ઓર્ડરનો વિસ્ફોટ:

ટોસ જીતીને મુંબઈના કેપ્ટન હાર્દિક પંડ્યાએ બેંગલુરુને પ્રથમ બેટિંગ માટે આમંત્રણ આપ્યું હતું. ફિલ સોલ્ટ અને વિરાટ કોહલીએ પ્રથમ વિકેટ માટે 120 રનની ભાગીદારી કરી ધમાકેદાર શરૂઆત અપાવી હતી. ફિલ સોલ્ટે આક્રમક બેટિંગ કરતા સૌથી વધુ 78 રન ફટકાર્યા હતા. વિરાટ કોહલીએ 37 બોલમાં 50 રન પૂરા કર્યા હતા. મધ્ય ઓવરોમાં કેપ્ટન રજત પાટીદારે તોફાન મચાવતા માત્ર 17 બોલમાં અડધી સદી ફટકારી હતી. પાટીદારે 20 બોલમાં 53 રન બનાવ્યા હતા, જેમાં મયંક માર્કંડેની એક ઓવરમાં ત્રણ સિક્સરનો સમાવેશ થાય છે. આરસીબીએ 4 વિકેટ ગુમાવી 240 રનનો વિશાળ સ્કોર બનાવ્યો હતો.

મુંબઈની નબળી બોલિંગ અને બુમરાહની નિષ્ફળતા:

મુંબઈના મુખ્ય બોલર જસપ્રીત બુમરાહ આર્થિક રીતે કરકસરયુક્ત સાબિત થયા હોવા છતાં, તેઓ 4 મેચમાં એક પણ વિકેટ ઝડપી શક્યા નથી. ટ્રેન્ટ બોલ્ટ અને હાર્દિક પંડ્યા વિરુદ્ધ ફિલ સોલ્ટે આક્રમક વલણ અપનાવ્યું હતું. મિચેલ સેન્ટનરની એક ઓવરમાં સોલ્ટે ત્રણ સિક્સર ફટકારી હતી. શાર્દુલ ઠાકુરે સોલ્ટને આઉટ કરી ભાગીદારી તોડી હતી.

મુંબઈ ઈન્ડિયન્સનો વળતો પ્રહાર પણ ટૂંકો પડ્યો:

241 રનના લક્ષ્યાંકનો પીછો કરવા ઉતરેલી મુંબઈની ટીમ 5 વિકેટના નુકસાને 222 રન જ બનાવી શકી હતી. રોહિત શર્મા અને રયાન રિકલ્ટન વચ્ચે 57 રનની ભાગીદારી થઈ હતી, પરંતુ રોહિતને હેમસ્ટ્રિંગની સમસ્યા થતા રિટાયર્ડ હર્ટ થઈ બહાર જવું પડ્યું હતું. રિકલ્ટન 22 બોલમાં 37 રન બનાવી સુયશ શર્માનો શિકાર બન્યા હતા. સૂર્યકુમાર યાદવ 33 રન અને કેપ્ટન હાર્દિક પંડ્યા 40 રન બનાવી આઉટ થયા હતા. છેલ્લે શેરફેન રધરફોર્ડે 31 બોલમાં અણનમ 71 રન (9 સિક્સર, 1 ફોર) ફટકારી લડત આપી હતી, પરંતુ તે ટીમને જીત અપાવી શક્યા નહીં.

બેંગલુરુ તરફથી કૃણાલ પંડ્યાએ 4 ઓવરમાં 26 રન આપી 1 વિકેટ લીધી હતી, જ્યારે સુયશ શર્માએ 2 અને જેકબ ડફીએ 1 વિકેટ ઝડપી હતી.