મુલ્લાનપુર: અફઘાનિસ્તાન સામેની એકમાત્ર ટેસ્ટ મેચમાં યુવાન બેટ્સમેન સાઈ સુદર્શનને પોતાની ટેલેન્ટનો પરચો આપતા શાનદાર ૮૧ રનની ઇનિંગ રમી છે. મુખ્ય કોચ ગૌતમ ગંભીરના વિશ્વાસ અને પ્રોત્સાહને સાઈ સુદર્શનનને મેદાન પર જે 'ફ્રીડમ' આપી, તેનું પરિણામ આજે સ્કોરબોર્ડ પર સ્પષ્ટ દેખાયું.

કોચની સ્વતંત્રતા, સાઈનું પ્રદર્શન

મેચ બાદની પ્રેસ કોન્ફરન્સમાં સુદર્શનને ખુલીને વાત કરી. તેણે કહ્યું, "જ્યારે કોચ, ટીમ અને કેપ્ટન તમારામાં વિશ્વાસ મૂકે છે, ત્યારે મનમાંથી 'શું હું આગલી મેચ રમીશ?' જેવો ડર નીકળી જાય છે. ગંભીર સરે મને મારી જાતને વ્યક્ત કરવાની જે આઝાદી આપી છે, તે માનસિક રીતે ખૂબ જ શાંતિ અને આત્મવિશ્વાસ આપે છે." સાઈએ સાબિત કરી દીધું છે કે પ્રતિભાને જ્યારે યોગ્ય માર્ગદર્શન મળે, ત્યારે તે કેવી રીતે સફળતાના શિખરો સર કરી શકે છે.

કે.એલ. રાહુલનો સાથ અને સ્પિન સામે પ્રભુત્વ

સાઈ સુદર્શનન અને અનુભવી કે.એલ. રાહુલની જોડીએ અફઘાનિસ્તાનના બોલરોને હંફાવી દીધા હતા. બીજી વિકેટ માટે ૧૩૯ રનની ભાગીદારી વિશે વાત કરતા સુદર્શનને જણાવ્યું કે, રાહુલ સાથે બેટિંગ કરવી એ એક અલગ જ નિશ્ચિતતા આપે છે. "રાહુલ ભાઈ રમતને ખૂબ જ નજીકથી વાંચે છે, તેમના સૂચનો મને વિકેટ પર ટકી રહેવામાં અને બોલરોને ખલેલ પહોંચાડવામાં ઘણી મદદરૂપ થયા."

સ્પિન સામે રણનીતિ: સમય વિતાવવો નહીં, રન બનાવવા

ભારતીય ટીમ માટે સ્પિન-ફ્રેન્ડલી પીચ હંમેશા પડકારજનક રહી છે, પરંતુ આ વખતે સાઈ અને તેની ટીમે કંઈક અલગ જ પ્લાન બનાવ્યો હતો. સાઈએ ખુલાસો કર્યો કે, "અમારી વ્યૂહરચના માત્ર પીચ પર સમય વિતાવવાની નહોતી, પરંતુ સ્પિનરો પર પ્રભુત્વ મેળવીને સ્કોરબોર્ડને સતત ચાલુ રાખવાની હતી." પીચના સ્વભાવ અંગે સાઈએ આગાહી કરી હતી કે, જેમ જેમ દિવસો પસાર થશે તેમ વિકેટ વધુ ધીમી પડશે અને સ્પિનરો માટે વધુ ટર્ન લેશે, જે આગામી દિવસોમાં ભારતીય સ્પિનરો માટે પણ ફાયદાકારક સાબિત થઈ શકે છે.

સાઈ સુદર્શનનનું આ પ્રદર્શન દર્શાવે છે કે ભારતીય ટીમ હવે નવી પેઢીના ખેલાડીઓ સાથે ભવિષ્યના લક્ષ્યો તરફ મક્કમ ડગલે આગળ વધી રહી છે. ગૌતમ ગંભીરનું 'માર્ગદર્શન' અને સાઈની 'આક્રમકતા'નું આ મિશ્રણ આવનારા સમયમાં ટીમ ઇન્ડિયા માટે અનેક જીત લાવશે તેવી આશા બંધાઈ છે.