બર્મિંગહામ, : આઈસીસી મહિલા T20 વર્લ્ડ કપ 2026 માં આજે રવિવારે બર્મિંગહામના એજબેસ્ટન મેદાન પર ભારત અને પાકિસ્તાનની ટીમો વચ્ચે રમાનારા હાઈવોલ્ટેજ મુકાબલા પહેલાં, પાકિસ્તાની ખેલાડીઓ સાથે હાથ મિલાવવા (Handshake) અંગેના સવાલ પર ભારતીય કેપ્ટન હરમનપ્રીત કૌરે સ્પષ્ટ શબ્દોમાં કંઈ પણ કહેવાનો ઇનકાર કરી માત્ર ક્રિકેટ પર ધ્યાન કેન્દ્રિત કરવાની વાત કરતાં દેશભરમાં ભારે ચર્ચા જાગી છે.

આ રોમાંચક મેચ પહેલા પાકિસ્તાની ખેલાડીઓ સાથે Handshake એટલે કે હાથ મિલાવવા અંગેના સવાલ પર ભારતીય મહિલા ટીમની કેપ્ટન હરમનપ્રીત કૌરે કંઈ પણ કહેવાનો ઇનકાર કરી દીધો છે. તેણે સ્પષ્ટ શબ્દોમાં કહ્યું કે, "અમે અહીં માત્ર ક્રિકેટ માટે આવ્યા છીએ અને અમે અન્ય કોઈ બાબત વિશે વાત કરતા નથી." નોંધનીય છે કે, વર્ષ 2025 ના મેન્સ એશિયા કપથી ભારતીય ખેલાડીઓએ પાકિસ્તાની ખેલાડીઓ સાથે 'નો હેન્ડશેક' (No handshake) એટલે કે હાથ ન મિલાવવાની નીતિ આપનાવી છે. આ સિલસિલો રાઇઝિંગ સ્ટાર્સ એશિયા કપ, અંડર-19 એશિયા કપ અને અંડર-19 વર્લ્ડ કપની મેચોમાં પણ સતત જોવા મળ્યો છે.

ગયા વર્ષે રમાયેલા મહિલા વર્લ્ડ કપ દરમિયાન પણ હરમનપ્રીત કૌરે પાકિસ્તાનની કેપ્ટન ફાતિમા સના સાથે હાથ મિલાવ્યા ન હતા, જેથી T20 વર્લ્ડ કપ 2026 માં પણ આવું જ વલણ જોવા મળી શકે છે. રાજકીય મુદ્દાઓને કારણે લાંબા સમયથી ભારત અને પાકિસ્તાન વચ્ચે કોઈ દ્વિપક્ષીય સિરીઝ રમાઈ નથી, બંને ટીમો માત્ર મલ્ટીનેશન ટૂર્નામેન્ટમાં જ એકબીજા સામે ટકરાય છે. જોકે, પુલવામા હુમલા બાદ ક્રિકેટના મેદાન પર પણ બંને દેશો વચ્ચે અંતર વધી ગયું છે. પુલવામા હુમલામાં માર્યા ગયેલા માસૂમ લોકોના સન્માનમાં ભારતીય ખેલાડીઓ ક્રિકેટના મેદાન પર પાકિસ્તાની ખેલાડીઓ સાથે હાથ મિલાવતા નથી.

બંને દેશો વચ્ચે સીમાપારના તણાવ અને રમતગમતના સંબંધો પર તેની અસરોનો ઇતિહાસ ઘણો લાંબો રહ્યો છે, જેમાં સુરક્ષા અને રાષ્ટ્રીય સન્માનને સર્વોપરી રાખવામાં આવે છે. આજે રમાનારી આ મહામેચમાં ભારતીય ટીમ પોતાની રમતની સર્વોચ્ચતા સાબિત કરવા મેદાનમાં ઉતરશે. ક્રિકેટ રસિયાઓની નજર માત્ર મેચના પરિણામ પર જ નહીં, પરંતુ મેચની શરૂઆત અને પૂર્ણાહુતિ વખતે બંને દેશોના ખેલાડીઓના મેદાન પરના વર્તન અને શિષ્ટાચાર પર પણ રહેશે, જે આગામી આંતરરાષ્ટ્રીય ટૂર્નામેન્ટ્સ માટે એક નવો માપદંડ નક્કી કરી શકે છે.