ભારતીય ક્રિકેટ ટીમના પૂર્વ દિગ્ગજ કેપ્ટન અને હેડ કોચ રાહુલ દ્રવિડના નાના પુત્રએ ક્રિકેટના મેદાન પર પોતાની બેટિંગથી સનસનાટી મચાવી દીધી છે. ક્રિકેટ અહેવાલો અનુસાર, શ્રીલંકા સામે રમાયેલી બીજી યુવા વનડે મેચમાં અન્વય દ્રવિડે પિતાની ધીમી બેટિંગ શૈલીથી તદ્દન વિપરિત આક્રમક ઇનિંગ રમીને ટીમને મજબૂત સ્થિતિમાં પહોંચાડી દીધી છે.

ભારતીય જુનિયર ક્રિકેટમાં સચિન તેંડુલકરના પુત્ર અર્જુન બાદ હવે વધુ એક દિગ્ગજ ક્રિકેટરના પુત્રનો સૂર્યોદય થઈ ચૂક્યો છે ભારતીય અંડર-19 ક્રિકેટ ટીમ તરફથી રમી રહેલા વિકેટકીપર બેટ્સમેન અન્વય દ્રવિડે શ્રીલંકા વિરુદ્ધ રમાયેલી 50 ઓવરની મેચમાં વનડે ક્રિકેટને ટી20 ના અંદાજમાં રમીને સૌને આશ્ચર્યચકિત કરી દીધા છે 

આ મેચમાં ભારતીય ટીમે ટોસ જીતીને પ્રથમ બેટિંગ કરવાનો નિર્ણય કર્યો હતો, પરંતુ ટીમની શરૂઆત અત્યંત ખરાબ રહી હતી. ભારતે માત્ર 78 રનના સ્કોર પર પોતાની 3 મહત્વની વિકેટો ગુમાવી દીધી હતી અને જોતજોતામાં ચોથી વિકેટ પણ 81 રનના સ્કોર પર પડી ગઈ હતી. આવા કટોકટીના સમયે અન્વય દ્રવિડ બેટિંગ કરવા મેદાન પર ઉતર્યો હતો.

જ્યારે ભારતીય ટીમ 81 રનમાં 4 વિકેટ ગુમાવીને પેવેલિયન ભેગી થવાના આરે હતી, ત્યારે અન્વય દ્રવિડને બીજા છેડેથી યુવા બેટ્સમેન અર્જુન રાજપૂતનો મજબૂત સાથ મળ્યો હતો આ બંને યુવા ખેલાડીઓએ પિચ પર સમય વિતાવવાને બદલે શ્રીલંકન બોલરો પર વળતો પ્રહાર કરવાનું શરૂ કર્યું હતું. બંને વચ્ચે પાંચમી વિકેટ માટે 145 રનની શાનદાર અને નિર્ણાયક ભાગીદારી નોંધાઈ હતી

આ ભાગીદારીની મદદથી ભારતીય ટીમનો સ્કોર 221 રન સુધી પહોંચી શક્યો હતો. આ દરમિયાન અર્જુન રાજપૂત 81 બોલમાં 76 રનની મહત્વપૂર્ણ ઇનિંગ રમીને કમનસીબે રન આઉટ થયો હતો, જેના કારણે આ મજબૂત જોડી તૂટી હતી. પરંતુ અન્વયે એક છેડો સાચવી રાખીને રન રેટને ધીમો પડવા દીધો ન હતો.

વિકેટની પાછળ ગ્લોવ્ઝ સંભાળવાની સાથે બેટિંગમાં પણ કમાલ કરનાર અન્વય દ્રવિડે મેદાનની ચારેય દિશામાં શાનદાર શોર્ટ્સ ફટકાર્યા હતા તેણે માત્ર 47 બોલનો સામનો કરીને પોતાની અડધી સદી પૂરી કરી લીધી હતી. અન્વય દ્રવિડે પોતાની 87 રનની ઇનિંગ દરમિયાન 67 બોલ રમ્યા હતા, જેમાં 9 આકર્ષક ચોગ્ગા અને 1 ગગનચુંબી છગ્ગાનો સમાવેશ થાય છે.

તેની પાસે પોતાની પ્રથમ આંતરરાષ્ટ્રીય યુવા વનડે સદી બનાવવાની શાનદાર તક હતી, પરંતુ તે શ્રીલંકાના ડાબોડી ફાસ્ટ બોલર ગિમ્હાન મેન્ડિસનો શિકાર બન્યો હતો સદી ચૂકી જવા છતાં અન્વયની આ ઇનિંગે પિતા રાહુલ દ્રવિડને પણ ગૌરવ અપાવ્યું છે, કારણ કે રાહુલ દ્રવિડ ટેસ્ટ મેચોના નિષ્ણાત ગણાતા હતા જ્યારે અન્વય આધુનિક ક્રિકેટના રંગે રંગાયેલો દેખાય છે.

અન્વય દ્રવિડ આઉટ થયા બાદ ભારતીય લોઅર ઓર્ડરની બેટિંગ લાંબો સમય ટકી શકી નહોતી. ભારતે પોતાના છેલ્લા 3 વિકેટ માત્ર 22 રનની અંદર ગુમાવી દીધા હતા અને સમગ્ર ટીમ 285 રન બનાવીને ઓલઆઉટ થઈ ગઈ હતી. શ્રીલંકા તરફથી ઘાતક બોલિંગ કરતા ગિમ્હાન મેન્ડિસે 41 રન આપીને 5 વિકેટ ઝડપી હતી.

ભારતે શ્રેણીની પ્રથમ મેચમાં શ્રીલંકાને ૪ વિકેટે હરાવ્યું હતું, અને અન્વયની આ ઇનિંગના કારણે ભારતે આ મેચમાં પણ વિજયી સ્કોર ઊભો કર્યો છે. આ પ્રદર્શનથી સાબિત થાય છે કે અન્વય દ્રવિડ આગામી સમયમાં ભારતીય સિનિયર ટીમ માટે પણ વિકેટકીપર-બેટ્સમેન તરીકે મોટો દાવેદાર બની શકે છે.