વિન્ડહોક : વર્ષ ૨૦૨૭ માં યોજાનારા 'ICC પુરુષ ODI વર્લ્ડ કપ' ના ત્રણેય સહ-યજમાન દેશો—દક્ષિણ આફ્રિકા, ઝિમ્બાબ્વે અને નામિબિયા—ક્રિકેટના મેદાન પર એક નવો ઈતિહાસ રચવા માટે સજ્જ થયા છે. વર્લ્ડ કપ જેવા મેગા ઈવેન્ટની તૈયારીઓના ભાગરૂપે આ ત્રણેય પડોશી દેશો વચ્ચે આ જ મહિનાના અંતમાં એક ઐતિહાસિક T20I ત્રિકોણીય શ્રેણી (Tri-Series) નું આયોજન કરવામાં આવ્યું છે. આ શ્રેણી ૨૮ ઓગસ્ટથી નામિબિયાની રાજધાની વિન્ડહોક ખાતે શરૂ થશે, જેને ૨૦૨૭ ના આફ્રિકા ખંડમાં યોજાનારા ક્રિકેટ મહાકુંભ તરફનું એક મહત્વપૂર્ણ પગલું માનવામાં આવી રહ્યું છે.

આ ત્રિકોણીય સિરીઝ માત્ર વર્લ્ડ કપની તૈયારીઓ પૂરતી સીમિત નથી, પરંતુ તે ૨૦૨૭ માં લોન્ચ થનારા નવા ખંડીય ટૂર્નામેન્ટ 'આફ્રિકા કપ' માટે પણ મજબૂત પાયો નાખશે. ૨૪ વર્ષના લાંબા અંતરાલ બાદ આફ્રિકામાં ODI વર્લ્ડ કપ પરત ફરી રહ્યો છે, ત્યારે આફ્રિકા ક્રિકેટ એસોસિએશન અને ત્રણેય દેશોના ક્રિકેટ બોર્ડ (CSA, ઝિમ્બાબ્વે ક્રિકેટ અને ક્રિકેટ નામિબિયા) ના વડાઓએ આ પહેલને આફ્રિકન ક્રિકેટના નવા સુવર્ણ યુગની શરૂઆત ગણાવી છે. ઉલ્લેખનીય છે કે, નામિબિયા પ્રથમ વખત કોઈ સિનિયર ICC વર્લ્ડ કપ મેચોની યજમાની કરવા જઈ રહ્યું છે.

આ ત્રિકોણીય શ્રેણીની શરૂઆત ૨૮ ઓગસ્ટે દક્ષિણ આફ્રિકા અને નામિબિયા વચ્ચેની ટક્કરથી થશે. ત્યારબાદ ૨૯ ઓગસ્ટે દક્ષિણ આફ્રિકા વિ. ઝિમ્બાબ્વે, ૩૧ ઓગસ્ટે ઝિમ્બાબ્વે વિ. નામિબિયા, ૧ સપ્ટેમ્બરે ઝિમ્બાબ્વે વિ. દક્ષિણ આફ્રિકા, ૩ સપ્ટેમ્બરે નામિબિયા વિ. ઝિમ્બાબ્વે અને ૪ સપ્ટેમ્બરે નામિબિયા વિ. દક્ષિણ આફ્રિકા વચ્ચે લીગ મેચો રમાશે. પોઈન્ટ્સ ટેબલમાં મોખરે રહેનારી ટોચની બે ટીમો વચ્ચે ૬ સપ્ટેમ્બરના રોજ ફાઈનલ મુકાબલો ખેલાશે. આ પ્રવાસ ત્રણેય ટીમોને વર્લ્ડ કપ પહેલાં અત્યંત મૂલ્યવાન મેચ પ્રેક્ટિસ પૂરી પાડશે.