નવી દિલ્હી: તા.૧૧ : ભારતીય ક્રિકેટ ઇતિહાસના સૌથી સફળ સ્પિનરોમાંના એક હરભજન સિંહે પોતાની કારકિર્દીના શરૂઆતી દિવસો સાથે જોડાયેલી એક અત્યંત વિવાદાસ્પદ ઘટના અંગે મોટો ખુલાસો કર્યો છે. વર્ષ ૨૦૦૦ માં નેશનલ ક્રિકેટ એકેડેમી (NCA) માંથી પોતાની હકાલપટ્ટી અંગે વાત કરતા ભજ્જીએ સ્પષ્ટ કર્યું છે કે તેમને આપવામાં આવેલી સજા તદ્દન ગેરકાયદેસર હતી અને તેમણે કોઈ ભૂલ કરી નહોતી, પરંતુ પોતાના હક અને સાચા આહાર માટે અવાજ ઉઠાવ્યો હતો.

ડાયેટ ચાર્ટ ફાડવા પાછળનું સાચું કારણ

હરભજન સિંહ NCA ની પ્રથમ બેચના તાલીમાર્થીઓનો ભાગ હતા. તેમણે 'ક્રિકેટ નેક્સ્ટ' સાથેની વાતચીતમાં ખુલાસો કર્યો કે NCA માં નિષ્ણાતો દ્વારા આહાર માટેનો એક ખાસ ડાયેટ ચાર્ટ મૂકવામાં આવ્યો હતો. પરંતુ, તાલીમાર્થીઓને જે ખોરાક પીરસવામાં આવતો હતો તે આ ચાર્ટ મુજબ બિલકુલ નહોતો. વારંવાર ફરિયાદો કરવા છતાં સારું ભોજન ન મળતા ભજ્જીનો ગુસ્સો ભડકી ઉઠ્યો હતો અને તેમણે વિરોધ દર્શાવવા માટે તે ડાયેટ ચાર્ટ ફાડી નાખ્યો હતો, જેના પરિણામે તેમને એકેડેમીમાંથી કાઢી મૂકવામાં આવ્યા હતા.

"BCCI માં કેટલાક લોકો નહોતા ઇચ્છતા કે કોઈ પ્રશ્ન પૂછે"

પોતાના આકરા વલણને વાજબી ઠેરવતા ૪૬ વર્ષીય હરભજને જણાવ્યું, "હું મારા હક માટે લડી રહ્યો હતો. જો મેં તે દિવસે અવાજ ન ઉઠાવ્યો હોત તો ક્યારેય સ્થિતિ બદલાઈ ન હોત. મારા વિરોધ બાદ ડાયેટ પ્લાન ચોક્કસ બદલાયો, પણ મને કાઢી મૂકવામાં આવ્યો તે અલગ વાત છે. તે સમયે BCCI માં કેટલાક એવા લોકો હતા જેઓ બિલકુલ નહોતા ઇચ્છતા કે કોઈ યુવા ખેલાડી ઉભો થઈને તેમને સવાલ પૂછે."

ભારતીય ક્રિકેટના દિગ્ગજ ખેલાડીની સફળ કારકિર્દી

આ વિવાદ છતાં હરભજન સિંહે પોતાની મહેનતથી ભારતીય ક્રિકેટમાં સુવર્ણ ઇતિહાસ રચ્યો. ૧૯૯૮ થી ૨૦૧૬ દરમિયાન તેમણે ભારત માટે ૩૬૫ આંતરરાષ્ટ્રીય મેચો રમીને કુલ ૭૦૭ વિકેટો ઝડપી હતી. આંતરરાષ્ટ્રીય ક્રિકેટમાં સૌથી વધુ વિકેટ લેનારા ભારતીય બોલરોની યાદીમાં તેઓ અનિલ કુંબલે (૯૫૩) અને આર. અશ્વિન (૭૬૫) પછી ત્રીજા સ્થાને આવે છે. (નોંધ: હાલમાં બેંગલુરુ સ્થિત NCA નું નામ બદલીને 'સેન્ટર ઓફ એક્સેલન્સ' કરવામાં આવ્યું છે.)