મુંબઈ : રમતપ્રેમીઓ માટે એક અત્યંત ઉત્સાહજનક સમાચાર સામે આવ્યા છે. મુંબઈ શહેર હવે ક્યારેય ન જોઈ હોય તેવી હાઈ-વોલ્ટેજ પેડલ (Padel) સ્પર્ધા માટે સંપૂર્ણરીતે સજ્જ થઈ ગયું છે. 'વર્લ્ડ પેડલ લીગ' (WPL) ની ચોથી સીઝનનો ૧૨ થી ૧૬ ઓગસ્ટ દરમિયાન વર્લી સ્થિત પ્રતિષ્ઠિત 'ડોમ, SVP સ્ટેડિયમ' ખાતે પ્રારંભ થવા જઈ રહ્યો છે. પાંચ દિવસ સુધી ચાલનારી આ ગ્રાન્ડ ટુર્નામેન્ટમાં વિશ્વના પ્રીમિયર પેડલ ચેમ્પિયન્સ, વર્લ્ડ રેન્કિંગના ટોપ-૨૦ ખેલાડીઓ અને ભૂતપૂર્વ વિશ્વ નંબર-૧ ખેલાડીઓ પોતાના કૌશલ્યનો જાદુ વિખેરશે.

૬ ફ્રેન્ચાઇઝી ટીમો વચ્ચે થશે મહાસંગ્રામ

આ ટુર્નામેન્ટમાં રમત જગતના દિગ્ગજ ખેલાડીઓથી સજ્જ કુલ ૬ ફ્રેન્ચાઇઝી ટીમો સામસામે ટકરાશે. જેમાં વેદાંત લેપર્ડ્સ, ખાન ટાઇગર્સ, VB રિયલ્ટી ચિત્તા, ઓસી મેવેરિક્સ જગુઆર્સ, હબટાઉન પેનોરમા પેન્થર્સ અને ગેમ ચેન્જર્સ લાયન્સનો સમાવેશ થાય છે. આંતરરાષ્ટ્રીય સર્કિટના સ્થાપિત ચેમ્પિયન્સની હાજરીને કારણે ભારતીય રમતપ્રેમીઓને આ રમતની અદ્ભુત સ્પીડ, ટેકનીક અને તીવ્રતાને એકદમ નજીકથી નિહાળવાનો સુવર્ણ અવસર મળશે.

ભારતમાં પેડલ રમતનો ઝડપી વિકાસ: મહેશ ભૂપતિ

વર્લ્ડ પેડલ લીગના સહ-સ્થાપક અને ભારતના પૂર્વ ટેનિસ દિગ્ગજ મહેશ ભૂપતિએ આ તકે ખુશી વ્યક્ત કરતાં જણાવ્યું હતું કે, "આ સિઝનમાં જોડાનારા વિશ્વસ્તરીય ખેલાડીઓનું લાઇન-અપ એ સાબિત કરે છે કે ભારતમાં પેડલ રમતનો વિકાસ કેટલી ઝડપથી થઈ રહ્યો છે. વિશ્વના સર્વશ્રેષ્ઠ ખેલાડીઓ ભારત આવીને રમે તે આ રમતની લોકપ્રિયતા માટે એક ઐતિહાસિક ક્ષણ છે અને તેનાથી દેશના યુવા રમતવીરોમાં પેડલ પ્રત્યે નવો ઉત્સાહ અને રસ જાગશે."