બેલફાસ્ટ: તા.13 બેલફાસ્ટના મેદાન પર રમાયેલી ચોથી વન-ડે મેચમાં અફઘાનિસ્તાને પોતાના વિસ્ફોટક પ્રદર્શનના જોરે આયર્લેન્ડને ૪૨ રનથી ધૂળ ચાટતી કરીને પાંચ મેચોની વન-ડે શ્રેણીમાં ૩-૦ થી અજેય સરસાઈ મેળવી લીધી છે. ટોસ જીતીને પ્રથમ બેટિંગ કરવા ઉતરેલી અફઘાનિસ્તાનની ટીમે નિર્ધારિત ૫૦ ઓવરમાં ૯ વિકેટના ભોગે ૩૪૩ રનનો પહાડ જેવો સ્કોર ખડક્યો હતો. અફઘાનિસ્તાન તરફથી સેદિકુલ્લાહ અટલની ૧૪૩ રનની કારકિર્દીની સર્વશ્રેષ્ઠ ઇનિંગ્સ અને ઇબ્રાહિમ ઝદરાનની ૧૦૭ રનની શાનદાર સદી વિજયનો મુખ્ય આધાર બની હતી.

અફઘાનિસ્તાનની શરૂઆત નબળી રહી હતી અને વિસ્ફોટક ઓપનર રહેમાનુલ્લાહ ગુરબાઝ માત્ર ૧૨ રન બનાવીને પેવેલિયન ભેગો થઈ ગયો હતો. પરંતુ ત્યારબાદ ક્રીઝ પર આવેલા સેદિકુલ્લાહ અટલ અને ઇબ્રાહિમ ઝદરાને આયર્લેન્ડના બોલરો પર આક્રમક ચડાઈ કરી દીધી હતી. બંને બેટ્સમેનો વચ્ચે બીજી વિકેટ માટે ૨૩૧ રનની રેકોર્ડબ્રેક ભાગીદારી નોંધાઈ હતી. ઝદરાને ૧૧૮ બોલમાં ૧૦૭ રન બનાવ્યા હતા, જ્યારે વધુ આક્રમક મિજાજ ધરાવતા અટલે માત્ર ૧૨૦ બોલમાં ૧૭ ચોગ્ગા અને ૪ સિક્સરની મદદથી ૧૪૩ રન ફટકારી દીધા હતા. જોકે અંતિમ ઓવરોમાં આયર્લેન્ડના બોલરોએ વાપસી કરીને અફઘાનિસ્તાનને ૩૪૩ રન પર રોકવામાં સફળતા મેળવી હતી.

૩૪૪ રનના વિશાળ લક્ષ્યાંકનો પીછો કરવા ઉતરેલી આયર્લેન્ડની ટીમે પણ મજબૂત અને વળતો પ્રહાર કર્યો હતો. કેપ્ટન એન્ડી બાલ્બિર્નીએ ૧૧૯ બોલમાં ૧૦૯ રનની કેપ્ટનશીપ ઇનિંગ્સ રમીને ટીમને મેચમાં જાળવી રાખી હતી. આ સિવાય મધ્યક્રમમાં કર્ટિસ કેમ્ફરે માત્ર ૪૬ બોલમાં ૮૪ રનની વિસ્ફોટક ઇનિંગ્સ રમીને અફઘાનિસ્તાનના કેમ્પમાં ખળભળાટ મચાવી દીધો હતો. બાલ્બિર્ની અને કેમ્ફર વચ્ચેની આક્રમક ભાગીદારીને કારણે આયર્લેન્ડ જીત તરફ આગળ વધી રહ્યું હોય તેમ જણાતું હતું.

પરંતુ જરૂરી રન રેટ સતત વધતો રહેતાં અને વિકેટો ગુમાવતાં આયર્લેન્ડની ટીમ ૪૮ ઓવરમાં ૩૦૧ રન બનાવીને ઓલઆઉટ થઈ ગઈ હતી. અફઘાનિસ્તાન તરફથી યામીન અહમદઝાઈએ ૭૧ રન આપીને ૪ વિકેટ અને સ્ટાર સ્પિનર રાશિદ ખાને ૪૯ રન આપીને ૩ મહત્વની વિકેટો ઝડપી હતી. આ જીત સાથે અફઘાનિસ્તાને વન-ડે શ્રેણીમાં પોતાની બાદશાહત જાળવી રાખી છે.