લંડન:  ઇંગ્લેન્ડમાં રમાઈ રહેલી રોમાંચક 'ધ હંડ્રેડ' ટૂર્નામેન્ટમાં બર્મિંગહામ ફોનિક્સની યુવા મહિલા બેટ્સમેન ડેવિના પેરિને એક એવો વિલક્ષણ શોટ રમીને ક્રિકેટ જગતને ચોંકાવી દીધું છે, જે સામાન્ય રીતે ક્રિકેટના મેદાન પર જોવા મળતો નથી. MI લંડન સામેની મેચ દરમિયાન પેરિને ટેનિસ ખેલાડીઓની માફક એક હાથે બેટ પકડીને સનસનાટીભર્યો 'વન-હેન્ડેડ રિવર્સ સ્કૂપ' શોટ ફટકારીને બોલને સીધો બાઉન્ડ્રી લાઇન બહાર ચાર રન માટે મોકલી આપ્યો હતો. આ અદ્ભુત ઇમ્પ્રુવાઇઝેશનનો વીડિયો સોશિયલ મીડિયા પર વાયરલ થતાં ક્રિકેટ ચાહકો તેની સર્જનાત્મકતાના ભારે વખાણ કરી રહ્યા છે.

બર્મિંગહામના એજબેસ્ટન ક્રિકેટ સ્ટેડિયમ ખાતે રમાયેલી આ મહિલા મેચમાં, એમઆઈ લંડને આપેલા 121 રનના લક્ષ્યાંકનો પીછો કરતી વખતે પેરિને બીજી ઓવરમાં ઓસ્ટ્રેલિયન ફાસ્ટ બોલર નિકોલા કેરીના બોલ પર આ અસાધારણ શોટ ફટકાર્યો હતો. 'ધ હંડ્રેડ' ના અધિકૃત સોશિયલ મીડિયા હેન્ડલ પર આ શોટને 'પ્લે ઓફ ધ ડે' જાહેર કરવામાં આવ્યો હતો. જોકે, આ મેચમાં પેરિન 8 રન બનાવીને આઉટ થઈ ગઈ હતી, પરંતુ તેનો આ સિંગલ-હેન્ડેડ શોટ સમગ્ર મેચનું મુખ્ય આકર્ષણ બની રહ્યો હતો.

આ રોમાંચક મુકાબલામાં બર્મિંગહામ ફોનિક્સે એલિસ પેરીની માસ્ટરક્લાસ ઇનિંગ્સની મદદથી 5 વિકેટે વિજય હાંસલ કર્યો હતો. પેરીએ માત્ર 39 બોલમાં 7 ચોગ્ગા અને 2 છગ્ગાની મદદથી અણનમ 62 રનની વિસ્ફોટક ઇનિંગ રમીને પોતાની ટીમને 8 બોલ બાકી રહેતાં જીત અપાવી હતી. ઉલ્લેખનીય છે કે, 18 વર્ષીય ડેવિના પેરિન ઇંગ્લેન્ડની અત્યંત આશાસ્પદ યુવા ખેલાડી છે અને તેણે ગત સિઝનમાં 'ધ હંડ્રેડ' ટૂર્નામેન્ટના ઇતિહાસમાં સૌથી નાની વયે સદી ફટકારવાનો ભવ્ય રેકોર્ડ પણ પોતાના નામે કર્યો હતો.