શ્રીગંગાનગર, તા.19 શ્રીલંકા સામે ગાલ ખાતે રમાયેલી ભારતીય ટીમની 600મી ઐતિહાસિક ટેસ્ટ મેચમાં 23 વર્ષીય ડાબોડી ઓર્થોડોક્સ સ્પિનર માનવ સુથારે પોતાની કાતિલ સ્પિન બોલિંગ વડે ઈતિહાસ રચી દીધો છે. મેચમાં કુલ 131 રન આપીને 10 વિકેટ ઝડપનારા સુથારના બળે ભારતે શ્રીલંકાને 165 રને પરાજય આપી સીરીઝમાં 1-0થી સરસાઈ મેળવી લીધી છે.

દિગ્ગજોના રેકોર્ડ ધ્વસ્ત કર્યા

માનવ સુથારે મેચમાં 131 રન આપીને 10 વિકેટ લેતા જ વિદેશની ધરતી પર સર્વશ્રેષ્ઠ મેચ પ્રદર્શન કરનારો પ્રથમ ભારતીય ડાબોડી સ્પિનર બની ગયો છે. તેણે ભૂતપૂર્વ કેપ્ટન બિશનસિંહ બેદીનો 1977નો 47 વર્ષ જૂનો રેકોર્ડ (10/194) તોડી નાખ્યો છે. આ સાથે જ શ્રીલંકા સામે 2008માં હરભજન સિંહે (10/153) અને 2017માં રવિચંદ્રન અશ્વિને (10/160) લીધેલી 10 વિકેટના સ્કોર કરતા પણ ઓછા રન આપીને સુથારે સર્વશ્રેષ્ઠ રન રેટનો નવો કીર્તિમાન સ્થાપિત કર્યો છે.

પરિવારનો ત્યાગ અને સંઘર્ષ

માનવની આ ઐતિહાસિક સિદ્ધિ પાછળ તેના પરિવારનો મોટો ત્યાગ રહેલો છે. રાજસ્થાનના શ્રીગંગાનગરમાં 3 ઓગસ્ટ, 2002ના રોજ જન્મેલા માનવના પિતા જગદીશ સુથાર એક સરકારી શાળામાં પીટીઆઈ (PTI) છે અને માતા સુશીલા દેવી ગૃહિણી છે. શ્રીગંગાનગરમાં ટર્ફ પિચની સુવિધા ન હોવાથી, બાળકના ઝૂનૂનને જોઈ પિતાએ બેંકમાંથી લોન લીધી હતી અને ઘર પાસેની જમીન ભાડે રાખીને ખાસ ટર્ફ પિચ તૈયાર કરાવી આપી હતી, જેના પર પ્રેક્ટિસ કરીને માનવ આજે આંતરરાષ્ટ્રીય સ્તરે ચમક્યો છે.