દુબઈ, તા.૨૦: આગામી ૨૮ ઓગસ્ટથી દુબઈના મેદાન પર શરૂ થઈ રહેલા મહિલા એશિયા કપ ૨૦૨૬ પહેલાં રમતગમતના વાતાવરણમાં મોટો રાજદ્વારી ગરમાવો જોવા મળી રહ્યો છે. એશિયન ક્રિકેટ કાઉન્સિલ (ACC) ના અધ્યક્ષ અને પાકિસ્તાન ક્રિકેટ બોર્ડ (PCB) ના વડા મોહસીન નકવી તથા ભારતીય ક્રિકેટ કંટ્રોલ બોર્ડ (BCCI) વચ્ચે ફરી એકવાર પ્રોટોકોલ અને ટ્રોફી વિતરણને લઈને તણાવ ઊભો થયો છે. જો સાત વખતની ચેમ્પિયન ભારતીય મહિલા ટીમ ૧૩ સપ્ટેમ્બરે રમાનારી ફાઇનલમાં જીત મેળવે છે, તો ટ્રોફી કોના હાથે સ્વીકારવામાં આવશે તેને લઈને ભારે અનિશ્ચિતતા પ્રવર્તી રહી છે.

આ સમગ્ર વિવાદ પાછળ ગયા વર્ષે પુરુષ એશિયા કપ દરમિયાન સર્જાયેલી ઘટના જવાબદાર છે. તે સમયે પહેલગામમાં થયેલા આતંકવાદી હુમલા અને સરહદ પરના લશ્કરી તણાવને કારણે ભારતીય પુરુષ ટીમે મોહસીન નકવીના હસ્તે ટ્રોફી સ્વીકારવાનો સ્પષ્ટ ઇનકાર કરી દીધો હતો. સામા પક્ષે નકવી પણ ટ્રોફી આપવા માટે અડગ રહ્યા હતા, જેના પરિણામે ભારતીય ટીમે ટ્રોફી વિના જ વિજયની ઉજવણી કરી હતી અને તે ટ્રોફી આજે પણ દુબઈસ્થિત ACC ની ઓફિસમાં પડી રહી છે.

હવે મહિલા એશિયા કપમાં પણ ભારત અને પાકિસ્તાન એક જ ગ્રૂપમાં સામેલ છે અને બંને વચ્ચે ૫ સપ્ટેમ્બરે લીગ મેચ રમાશે. BCCI એ સ્પષ્ટ કર્યું છે કે ટૂર્નામેન્ટ દરમિયાન ભારતીય ખેલાડીઓ પાકિસ્તાની ટીમ સાથે કોઈ પરંપરાગત શુભેચ્છા સંદેશ કે સોહાર્દની આપ-લે કરશે નહીં. પરંતુ જો ભારતીય કેપ્ટન હરમનપ્રીત કૌરની ટીમ ફાઈનલમાં પહોંચીને ટાઈટલ જીતે છે, તો સૂર્યકુમાર યાદવના સુકાનીપદ હેઠળ લેવાયેલા કડક નિર્ણયનું પુનરાવર્તન થશે કે કેમ તે અંગે બોર્ડે 'રાહ જુઓ અને જુઓ' (Wait and Watch) નો અભિગમ અપનાવ્યો છે.

આ વિવાદ અને ફજેતી ટાળવા માટે સ્પોર્ટ્સ વિશ્લેષકોનું માનવું છે કે ACC દ્વારા નકવીના બદલે કોઈ અન્ય તટસ્થ અધિકારી કે ક્રિકેટ દિગ્ગજને પ્રેઝન્ટેશન સમારોહમાં ટ્રોફી એનાયત કરવાની જવાબદારી સોંપવામાં આવે. જોકે, ભૂતકાળમાં નકવીના વલણને જોતા તેઓ પોતે જ મંચ પર હાજર રહેવાનો આગ્રહ રાખે તો ફાઇનલ મેચ બાદ મેદાનની સાથે-સાથે પ્રેઝન્ટેશન સ્ટેજ પર પણ ભારે ડ્રામા સર્જાવાની પૂરતી શક્યતા છે.