ઝ્યુરિચ : વિશ્વભરના ૨૧૧ સભ્ય દેશોને એક જ મંચ પર લાવવા માટે આંતરરાષ્ટ્રીય ફૂટબોલ સંસ્થા (FIFA) એ એક અત્યંત આકાંક્ષી અને અભૂતપૂર્વ યોજના ઘડી કાઢી છે. ન્યૂ યોર્ક ટાઇમ્સના અહેવાલો અનુસાર, ફિફાએ લિટલ લીગ વર્લ્ડ સિરીઝથી પ્રેરિત થઈને અંડર-૧૫ (U-15) 'ફૂટબોલ ફેસ્ટિવલ' શરૂ કરવાની યોજના બનાવી છે, જેમાં દુનિયાનો કોઈ પણ દેશ બાકાત રહેશે નહીં અને દરેક ૨૧૧ સભ્ય દેશની ટીમને રમવાની તક મળશે. કોઈ ક્વોલિફાયર મેચો વિના રમાનારા આ ટૂર્નામેન્ટમાં મેચો ટૂંકી અને નાની પીચો પર આયોજિત કરવામાં આવશે, જેના માટે ૩૨ જૂથો બનાવવામાં આવશે.

આ ટુર્નામેન્ટ માત્ર રમતગમત પૂરતી સીમિત ન રહેતાં તેને એક મલ્ટી-બિલિયન ડોલરના વૈશ્વિક વ્યવસાયમાં ફેરવવાની યોજના હતી. ચેલ્સી ક્લબના ચેરમેન ટોડ બોહલી અને એલ્ડ્રિજ ઇન્ડસ્ટ્રીઝ જેવા ખાનગી રોકાણકારો સાથે મળીને વ્યાપારી રોકાણ લાવવાનો પ્રયાસ કરવામાં આવ્યો હતો. આ ભવ્ય ઇવેન્ટ માટે અમેરિકાના ઓર્લાન્ડો સ્થિત 'ESPN વાઇડ વર્લ્ડ ઓફ સ્પોર્ટ્સ કોમ્પ્લેક્સ' અને ડિઝની થીમ પાર્કને યજમાન બનાવવા અંગે વિચારણા થઈ હતી, જ્યારે મેચોના બ્રોડકાસ્ટિંગ માટે ESPN નો સંપર્ક કરાયો હતો. આ ફોર્મેટથી જે દેશો ક્યારેય મુખ્ય વર્લ્ડ કપમાં નથી પહોંચી શક્યા તેમને વિશ્વ મંચ મળશે અને યુરોપિયન ક્લબોને નવી પ્રતિભાઓ શોધવામાં મદદ મળશે.

જોકે, ૨૦૨૬ના મેન્સ વર્લ્ડ કપ પહેલાં ખાનગી રોકાણકારો અને ફિફા વચ્ચે કમાણી તથા સંચાલનના હિસ્સાને લઈને કેટલાક મતભેદો સર્જાતાં આ ખાનગી રોકાણ યોજનાને હાલ પૂરતી મુલતવી રાખવામાં આવી છે. તેમ છતાં, ફિફાએ પોતાના મૂળ યુવા પ્રોજેક્ટને અટકાવ્યો નથી. ડિસેમ્બર ૨૦૨૫ માં લેવાયેલા નિર્ણયો બાદ, ફિફાએ પુષ્ટિ કરી છે કે પ્રથમ અંડર-૧૫ વૈશ્વિક ટુર્નામેન્ટનું આયોજન અઝરબૈજાનના બાકુ શહેરમાં કરવામાં આવશે, કારણ કે ત્યાં હજારો ખેલાડીઓ અને સ્ટાફ માટે જરૂરી માળખાકીય સુવિધાઓ ઉપલબ્ધ છે. ૨૦૨૭માં ગર્લ્સ માટે પણ આવી જ ટુર્નામેન્ટ યોજવાની યોજના છે.