દુબઈ : એશિયા કપ 2026 ના પોતાના પ્રથમ જ મુકાબલામાં ભારતીય મહિલા ક્રિકેટ ટીમે શાનદાર પ્રદર્શન કરતા થાઇલેન્ડને 94 રનના વિશાળ માર્જિનથી ધૂળ ચાટતી કરી દીધી છે. દુબઈના મેદાન પર રમાયેલી આ એકતરફી મેચમાં ભારતે આપેલા 160 રનના વિજયી લક્ષ્યાંક સામે થાઇલેન્ડની ટીમ 16.1 ઓવરમાં માત્ર 65 રન બનાવીને ઓલઆઉટ થઈ ગઈ હતી. ભારત તરફથી બોલિંગ અને બેટિંગ બંને ક્ષેત્રે શાનદાર પ્રદર્શન જોવા મળ્યું હતું, જોકે મધ્યક્રમમાં બેટ્સમેનોના ફ્લોપ શોએ થોડી ચિંતા પણ ઉપજાવી છે.

 

શેફાલી વર્માનું તોફાની અર્ધશતક અને મંધાનાની ઝડપી શરૂઆત

ટોસ જીતીને પહેલા બેટિંગ કરવા ઉતરેલી ભારતીય ટીમની શરૂઆત તોફાની રહી હતી.

ધમાકેદાર ઓપનિંગ: સ્મૃતિ મંધાનાએ માત્ર 10 બોલમાં 4 ચોગ્ગા ફટકારીને આક્રમક મૂડ બતાવ્યો હતો, જ્યારે બીજી તરફ શેફાલી વર્માએ થાઇલેન્ડના બોલરોની બરાબરની ક્લાસ લીધી હતી. બંનેએ મળીને માત્ર 3 ઓવરમાં 38 રન જોડ્યા હતા.

શેફાલી-પ્રતિકાની ભાગીદારી: મંધાના બાદ ડેબ્યુ કરનાર પ્રતિકા રાવલ (22 રન) સાથે મળીને શેફાલીએ સ્કોરબોર્ડને વેગ આપ્યો હતો. શેફાલીએ માત્ર 36 બોલમાં 64 રનની વિસ્ફોટક ઈનિંગ રમી હતી.

 

મધ્યક્રમનું ધબડકો: 50 રનથી વધુની આ ભાગીદારી તૂટ્યા બાદ સુલીપોર્ન લાઓમીના (3-26) તિલસ્મી સ્પિન આગળ ભારતીય મધ્યક્રમ લથડાયો હતો અને ટીમનો સ્કોર 91/1 થી સીધો 137/9 થઈ ગયો હતો. અંતમાં ક્રાંતિ ગૌડના આક્રમક હિટ્સની મદદથી ભારતે 20 ઓવરમાં 159/9 નો સ્કોર બનાવ્યો હતો.

દીપ્તિ અને નંદનીના સ્પિન જાકળમાં ફસાયું થાઇલેન્ડ

160 રનના લક્ષ્યાંકનો પીછો કરવા ઉતરેલી થાઇલેન્ડની ટીમ પ્રથમ ઓવરથી જ દબાણમાં આવી ગઈ હતી.

 

નબળી શરૂઆત: ઓપનર નટ્ટકમ ચાન્ટમને ક્રાંતિ ગૌડે પ્રથમ ઓવરમાં જ પેવેલિયન ભેગી કરી દીધી હતી. ત્યારબાદ શ્રી ચારાનીએ પણ બે મહત્વની વિકેટો ઝડપી હતી.

 

સ્પિનરોનો કાળો કેર: દીપ્તિ શર્મા (3 વિકેટ) અને નંદની શર્માએ (3 વિકેટ) શાનદાર બોલિંગ કરી થાઇલેન્ડના મધ્ય અને નીચલા ક્રમને સંપૂર્ણપણે વિખેરી નાખ્યો હતો.

 

એકલી લડત: થાઇલેન્ડ તરફથી માત્ર વિકેટકીપર બેટ્સમેન નન્નાપટ કોનચારોએનકાઇએ 48 બોલમાં 41 રન બનાવીને એકલે હાથે લડત આપી હતી. તેના સિવાય અન્ય કોઈ પણ બેટ્સમેન બે આંકડાના સ્કોર સુધી પહોંચી શક્યા ન હતા.

આ ભવ્ય વિજય સાથે ભારતે એશિયા કપ 2026 માં પોતાના અભિયાનનો ધમાકેદાર પ્રારંભ કર્યો છે.