નાગોયા (જાપાન) :આજે એશિયન ગેમ્સ 2026નો પહેલો દિવસ છે, અને ભારતને શરૂઆતની સાથે જ અત્યંત ઉત્સાહવર્ધક અને સારા સમાચાર મળ્યા છે. ભારતીય મહિલા શૂટિંગ ટીમે 10-મીટર એર રાઇફલ ઇવેન્ટમાં શાનદાર કૌશલ્ય દાખવતા બીજા સ્થાને રહીને દેશ માટે રજત ચંદ્રક પોતાના નામે કર્યો છે.

ઇલાવેનિલ વાલારિવન, સોનમ ઉત્તમ મસ્કર અને વિદર્શ કે વિનોદની પ્રતિભાશાળી ત્રિપુટીએ મેચ દરમિયાન અદ્ભુત તાલમેલ અને ચોકસાઈનું પ્રદર્શન કર્યું હતું. આ ભારતીય મહિલા ખેલાડીઓએ સંયુક્ત રીતે કુલ 1898.0 નો શાનદાર સ્કોર બનાવીને રજત ચંદ્રક જીતવામાં સફળતા મેળવી હતી, જ્યારે આ સ્પર્ધામાં ચીનની ટીમ પ્રથમ સ્થાને રહીને ગોલ્ડ મેડલ જીતવામાં સફળ રહી હતી.

આ મુકાબલો અત્યંત રોમાંચક અને રસાકસીભર્યો રહ્યો હતો, જેમાં ભારતે ચીનને દરેક તબક્કે સખત સ્પર્ધા આપી હતી. જોકે, ચીને શ્રેષ્ઠ પ્રદર્શન કરતા વિશ્વ રેકોર્ડ સાથે ગોલ્ડ મેડલ જીતી લીધો હતો. અગાઉ મહિલાઓની 10-મીટર એર રાઇફલમાં સર્વશ્રેષ્ઠ સ્કોર 1902 હતો, જે ચીને 2025 એશિયન શૂટિંગ ચેમ્પિયનશિપ દરમિયાન નોંધાવ્યો હતો, પરંતુ આ વખતે ચીની ખેલાડીઓએ નવો રેકોર્ડ બનાવીને 1904.02 નો સ્કોર કર્યો હતો. આ સ્પર્ધામાં જાપાન 1897.1 ના સ્કોર સાથે ત્રીજા સ્થાને રહીને કાંસ્ય ચંદ્રક મેળવવામાં સફળ રહ્યું હતું.

એશિયન ગેમ્સના ઇતિહાસમાં ભારતીય શૂટર્સનું પ્રદર્શન હંમેશાં પ્રશંસનીય રહ્યું છે અને આગામી દિવસોમાં અન્ય સ્પર્ધાઓમાં પણ ભારત વધુ મેડલ જીતે તેવી પ્રબળ સંભાવનાઓ છે. આ ભવ્ય સફળતા બાદ ભારતીય ટુકડીનો આત્મવિશ્વાસ સાતમા આસમાને પહોંચ્યો છે અને ખેલાડીઓ હવે આગામી ઇવેન્ટ્સમાં વધુ સુવર્ણ ચંદ્રકો જીતવાના લક્ષ્ય સાથે મેદાનમાં ઉતરશે.