નવી દિલ્હી: કોમનવેલ્થ ગેમ્સના બ્રોન્ઝ મેડલ વિજેતા ભાલા ફેંકનાર યશવીર સિંહને ઈજાગ્રસ્ત નીરજ ચોપરાના સ્થાને ટીમમાં સામેલ કરવામાં આવ્યો છે. એથ્લેટિક્સ ફેડરેશન ઓફ ઈન્ડિયા (AFI) એ આગામી એશિયન ગેમ્સ 2026 માટે 77 સભ્યોની ટ્રેક એન્ડ ફિલ્ડ ટીમની જાહેરાત કરી છે. એશિયન ગેમ્સ 19 સપ્ટેમ્બરથી 4 ઓક્ટોબર દરમિયાન જાપાનના આઈચી-નાગોયામાં યોજાવાની છે. બે વખતના ઓલિમ્પિક મેડલ વિજેતા ચોપરાને શરૂઆતમાં આ ગેમ્સ માટે 73 સભ્યોની ભારતીય એથ્લેટિક્સ ટીમમાં સામેલ કરવામાં આવ્યા હતા, પરંતુ હવે તે જકાર્તા 2018 અને હાંગઝોઉ 2023માં જીતેલા પોતાના ટાઇટલનો બચાવ કરી શકશે નહીં. રોહિત યાદવ પુરુષોની ભાલા ફેંક સ્પર્ધા માટે પસંદ કરાયેલો બીજો ભારતીય એથ્લેટ છે. દરમિયાન, પુરુષોની 110 મીટર હર્ડલ્સ એથ્લેટ તેજસ શિરસેને પણ ટીમમાંથી બહાર કરવામાં આવ્યો છે. ગ્લાસગો CWG દરમિયાન ડાબા પગમાં બે સ્ટ્રેસ ફ્રેક્ચર હોવા છતાં તેને શરૂઆતમાં 110 મીટર હર્ડલ્સ માટે પસંદ કરવામાં આવ્યો હતો. શરૂઆતમાં મંજૂર ટીમમાં છ વધુ ખેલાડીઓ ઉમેરવામાં આવ્યા છે. ૨૦૦ મીટર દોડવીર હરિતા ભદ્રા, ક્વાર્ટર-માઇલર કિરણ પહલ, પોલ વોલ્ટર સિંધુશ્રી જી, ટ્રિપલ જમ્પર આઈ આશા એલાંગો, ડિસ્કસ થ્રોઅર સાન્યા યાદવ અને હેમર થ્રોઅર પ્રવીણ કુમારનો ટીમમાં સમાવેશ કરવામાં આવ્યો છે.ભારતની એથ્લેટિક્સ ટીમમાં ૧૫ એશિયન ગેમ્સ ચેમ્પિયન અને મેડલ વિજેતાઓનો સમાવેશ થાય છે જેમણે અગાઉ ગેમ્સમાં ભાગ લીધો છે. અવિનાશ સાબલે, તજિન્દરપાલ સિંહ તૂર, પારુલ ચૌધરી અને અન્નુ રાની હાંગઝોઉ ૨૦૨૩ ના ચાર વ્યક્તિગત ચેમ્પિયન છે જેઓ ટીમમાં રહે છે અને તેમને જાપાનમાં તેમના ટાઇટલ બચાવવાની તક મળશે.સાબલે ત્રણ વર્ષ પહેલાં ૩૦૦૦ મીટર સ્ટીપલચેઝમાં ગોલ્ડ અને ૫૦૦૦ મીટરમાં સિલ્વર મેડલ જીત્યો હતો. તજિન્દરપાલ સિંહ તૂર એશિયન ગેમ્સ શોટ પુટ ટાઇટલની હેટ્રિક કરવાનો પ્રયાસ કરશે. હાંગઝોઉમાં ૫૦૦૦ મીટર દોડમાં ગોલ્ડ અને ૩૦૦૦ મીટર સ્ટીપલચેઝમાં સિલ્વર મેડલ જીતનાર પારુલની પસંદગી આઈચી-નાગોયામાં ત્રણ ઇવેન્ટ માટે કરવામાં આવી છે - ૧૫૦૦ મીટર, ૫૦૦૦ મીટર સ્ટીપલચેઝ અને ૩૦૦૦ મીટર. હાંગઝોઉ ૨૦૨૩માં સિલ્વર મેડલ જીતનાર જ્યોતિ યારાજી ૧૦૦ મીટર હર્ડલ્સમાં મોટી આંતરરાષ્ટ્રીય સ્પર્ધામાં વાપસી કરશે. હાંગઝોઉમાં ગોલ્ડ જીતનાર ભારતની પુરુષોની ૪x૪૦૦ મીટર રિલે ટીમનો ભાગ રહેલા રાજેશ રમેશની પણ પસંદગી કરવામાં આવી છે.