ઓસ્ટ્રેલિયાના દિગ્ગજ ઓલરાઉન્ડર ગ્લેન મેક્સવેલની આંતરરાષ્ટ્રીય ક્રિકેટમાંથી નિવૃત્તિઃ ૧૪ વર્ષની શાનદાર કારકિર્દીનો અંત
૩૮ વર્ષીય મેક્સવેલને ઘરઆંગણે વિદાય મેચ રમવાની તક ન મળીઃ યુવા ખેલાડીઓને પ્રાધાન્ય આપવાનો ઓસ્ટ્રેલિયન પસંદગીકારોનો નિર્ણયઃ શરીરને વધુ આરામ આપવા અને ફ્રેન્ચાઇઝી ક્રિકેટમાં રમવા નિવૃત્તિ લીધી
મેલબોર્ન, તા.૩: ઓસ્ટ્રેલિયાના વિસ્ફોટક ઓલરાઉન્ડર ગ્લેન મેક્સવેલે ૩૮ વર્ષની ઉંમરે આંતરરાષ્ટ્રીય ક્રિકેટના તમામ ફોર્મેટમાંથી નિવૃત્તિ જાહેર કરી છે. આ સાથે ૨૦૧૨માં શરૂ થયેલી તેમની ૧૪ વર્ષની આંતરરાષ્ટ્રીય કારકિર્દીનો અંત આવ્યો છે.
મેક્સવેલે આજે મંગળવારે 'ધ ફાઇનલ વર્ડ' પોડકાસ્ટમાં પોતાના નિર્ણયની જાહેરાત કરી હતી. તેમણે વિક્ટોરિયા તરફથી સ્થાનિક ચાર દિવસીય અને ૫૦ ઓવરની ક્રિકેટમાંથી પણ નિવૃત્તિ લેવાનો નિર્ણય કર્યો છે. જોકે તેઓ બિગ બેશ લીગ અને અન્ય ફ્રેન્ચાઇઝી ટી-૨૦ સ્પર્ધાઓમાં રમવાનું ચાલુ રાખશે.
મેક્સવેલે સ્પષ્ટ કર્યું હતું કે બાકીની ક્રિકેટ કારકિર્દી દરમિયાન કેટલીક ટુર્નામેન્ટમાં રમવા માટે હવે પોતાના શરીર અને ફિટનેસ પર વધુ ધ્યાન આપવાની જરૂર છે. ૨૦૨૬ના ટી-૨૦ વિશ્વકપ પહેલાં અને પછી ઓસ્ટ્રેલિયન ટીમ મેનેજમેન્ટ સાથે તેમની અનેક ચર્ચાઓ થઈ હતી. જોકે નિવૃત્તિ માટે તેમના ઉપર કોઈ દબાણ નહોતું.
બીજું મહત્ત્વનું કારણ ઓસ્ટ્રેલિયન ટીમમાં ચાલી રહેલું પેઢીપરિવર્તન છે. પસંદગીકારો આગામી આંતરરાષ્ટ્રીય સ્પર્ધાઓ અને ઓલિમ્પિકને ધ્યાનમાં રાખીને યુવા ખેલાડીઓને વધુ તક આપવા માગે છે.
મેક્સવેલને આશા હતી કે ૨૧ નવેમ્બરે મેલબોર્ન ક્રિકેટ ગ્રાઉન્ડ ઉપર ઇંગ્લેન્ડ સામે યોજાનારી ટી-૨૦ મેચમાં તેમને છેલ્લી વખત ઓસ્ટ્રેલિયાનું પ્રતિનિધિત્વ કરીને ઘરઆંગણે વિદાય લેવાની તક મળશે. પરંતુ ઇંગ્લેન્ડ સામેની શ્રેણી માટે ટીમમાં તેમનો સમાવેશ ન થતાં આ આશા અધૂરી રહી. મેક્સવેલે જણાવ્યું હતું કે તેઓ પસંદગીકારોની દિશા સમજે છે અને તેમના નિર્ણયનો આદર કરે છે.
મેક્સવેલે ઓસ્ટ્રેલિયા માટે કુલ ૨૮૬ આંતરરાષ્ટ્રીય મેચ રમી હતી. તેમાં ૭ ટેસ્ટ, ૧૪૯ વન-ડે અને ૧૩૦ ટી-૨૦ મેચનો સમાવેશ થાય છે. તેમણે કુલ ૭,૨૨૬ રન બનાવ્યા અને ૧૩૬ વિકેટ ઝડપી હતી. તેઓ ૨૦૧૫ અને ૨૦૨૩ના વન-ડે વિશ્વકપ તથા ૨૦૨૧ના ટી-૨૦ વિશ્વકપ જીતનારી ઓસ્ટ્રેલિયન ટીમનો ભાગ હતા.
૨૦૨૩ના વિશ્વકપમાં અફઘાનિસ્તાન સામે મુંબઈ ખાતે માત્ર ૧૨૮ બોલમાં અણનમ ૨૦૧ રનની તેમની ઇનિગ ક્રિકેટ ઇતિહાસની યાદગાર ઇનિગોમાં સ્થાન ધરાવે છે. ભારે સ્નાયુ ખેંચાણ છતાં તેમણે ઓસ્ટ્રેલિયાને અશક્ય લાગતો વિજય અપાવ્યો હતો.
મેક્સવેલે જૂન ૨૦૨૫માં જ વન-ડે ક્રિકેટમાંથી નિવૃત્તિ જાહેર કરી હતી. ફેબ્રુઆરી ૨૦૨૬માં ઓમાન સામેની ટી-૨૦ વિશ્વકપ મેચ ઓસ્ટ્રેલિયા માટે તેમની છેલ્લી આંતરરાષ્ટ્રીય મેચ બની હતી. હવે તેઓ મેલબોર્ન સ્ટાર્સ તરફથી બિગ બેશ લીગમાં રમવાનું ચાલુ રાખશે.
મેક્સવેલે તમામ આંતરરાષ્ટ્રીય ફોર્મેટમાંથી નિવૃત્તિ લીધી છે, તમામ પ્રકારની ક્રિકેટમાંથી નહીં. તેઓ ફ્રેન્ચાઇઝી ટી-૨૦ ક્રિકેટ રમવાનું ચાલુ રાખવાના છે.
(10:24 AM IST)
છેલ્લા 8 દિવસમાં સૌથી લોકપ્રિય 
