ગુજરાત ટાઈટન્સ અને રોયલ ચેલેન્જર્સ બેંગલુરુ વચ્ચેની IPL 2026 ની મેચમાં કંઈક એવું બન્યું જે માનવું મુશ્કેલ છે. એવા અહેવાલો છે કે ગુજરાત ટાઈટન્સ અને રોયલ ચેલેન્જર્સ બેંગલુરુ વચ્ચેની મેચ દરમિયાન એમ. ચિન્નાસ્વામી સ્ટેડિયમની CCTV સર્વેલન્સ સિસ્ટમ ખરાબ કરી દેવામાં આવી હતી.

RCB-ગુજરાતની આ મેચ દરમિયાન સ્ટેડિયમમાં લગાવેલા તમામ 240 CCTV કેમેરા બંધ હતા. આ કેસમાં બેંગલુરુ પોલીસે બે લોકો સામે કેસ દાખલ કર્યો છે. મંજુનાથ નામના એક વ્યક્તિની કર્ણાટકના હિરિયુરથી ધરપકડ કરવામાં આવી છે, જ્યારે અબ્દુલ કલામ નામના વ્યક્તિની ઉત્તર પ્રદેશથી ધરપકડ કરવામાં આવી છે.

ચિન્નાસ્વામીના બધા CCTV કેમેરા બંધ થયા પછી ગુરુગ્રામની એક સોફ્ટવેર કંપનીના કર્મચારી આદિત્ય ભટ્ટે પોલીસમાં ફરિયાદ નોંધાવી. તેણે બે ધરપકડ કરાયેલા માણસો પર મેચ દરમિયાન CCTV કંટ્રોલ રૂમમાં ઘૂસવાનો અને નેટવર્ક વીડિયો રેકોર્ડર તોડવાનો આરોપ લગાવ્યો.

ચિન્નાસ્વામી સ્ટેડિયમના CCTV કેમેરાના બંધ કરવાનું કારણ નાણાકીય વિવાદ હોવાનું કહેવાય છે. અહેવાલો અનુસાર બંને આરોપીઓ સ્ટેક ટેકનોલોજી પ્રાઈવેટ લિમિટેડના સબ-વેન્ડર IVS ડિજિટલ સોલ્યુશન્સ માટે કામ કરતા હતા. તેમને ₹10 લાખનું પેમેન્ટ બાકી હતું, તેથી તેમણે CCTV સિસ્ટમ જ ખરાબ કરી દીધી હતી. આનો અર્થ એ થયો કે જો આ સમય દરમિયાન કોઈ અકસ્માત થયો હોત, તો પોલીસ અને વહીવટીતંત્ર CCTV ફૂટેજ દ્વારા તેને શોધી શક્યું ન હોત. સદનસીબે ચિન્નાસ્વામી સ્ટેડિયમમાં મેચ કોઈ દુર્ધટના વિના સમાપ્ત થઈ હતી. RCB હવે રાયપુરમાં તેની હોમ મેચો રમશે. જો કે, પ્લેઓફ મેચો ફરી બેંગલુરુના ચિન્નાસ્વામી સ્ટેડિયમમાં રમાડવામાં આવી શકે છે.

રોયલ ચેલેન્જર્સ બેંગલુરુનું IPL 2026 માં પ્રદર્શન સારું છે. ટીમે પાંચ મેચ જીતી છે અને બે હારનો સામનો કરવો પડ્યો છે. વિરાટ કોહલી, રજત પાટીદાર, ભુવનેશ્વર કુમાર અને દેવદત્ત પડિકલે RCB માટે જોરદાર પ્રદર્શન કર્યું છે. હવે, RCB તેની આગામી મેચ દિલ્હી કેપિટલ્સ સામે અરુણ જેટલી સ્ટેડિયમમાં રમશે.