ધર્મશાલા, તા.૧૮: ઇન્ડિયન પ્રીમિયર લીગ (IPL) ૨૦૨૬ માં પંજાબ કિંગ્સ (PBKS) ની સફર ફરી એકવાર અત્યંત નિરાશાજનક અને દર્દનાક સાબિત થઈ રહી છે. ધર્મશાલાના સુંદર મેદાન પર રોયલ ચેલેન્જર્સ બેંગલુરુ (RCB) સામે મળેલી ૨૩ રનની કારમી હાર સાથે જ પંજાબની ટીમ સતત ૬ઠ્ઠી મેચ હારીને પ્લેઓફની રેસમાંથી સત્તાવાર રીતે લગભગ બહાર થઈ ગઈ છે. આ શરમજનક પરાજય બાદ પંજાબ કિંગ્સના મુખ્ય કોચ અને ઓસ્ટ્રેલિયાના દિગ્ગજ પૂર્વ કેપ્ટન રિકી પોન્ટિંગ ડગઆઉટમાં અત્યંત હતાશ, ચિંતિત અને એકલા બેઠેલા જોવા મળ્યા હતા.
ટીવી સ્ક્રીન પર લાઈવ મેચ દરમિયાન દેખાયેલી આ ભાવુક ક્ષણ જોઈને ભારતના દિગ્ગજ ઓફ-સ્પિનર રવિચંદ્રન અશ્વિન પોતાની લાગણીઓ કાબૂમાં રાખી શક્યા નહોતા. તેમણે પોન્ટિંગ પ્રત્યે સહાનુભૂતિ વ્યક્ત કરવાની સાથે પંજાબ ફ્રેન્ચાઈઝીના આયોજન અને રણનીતિ પર ગંભીર સવાલો ઉઠાવી દીધા છે.
'પોન્ટિંગની એ તસવીરે મને હચમચાવી દીધો'
પોતાના લોકપ્રિય યુટ્યુબ શો 'અશ કી બાત' માં પંજાબ કિંગ્સના વર્તમાન ફોર્મ અને કોચ રિકી પોન્ટિંગની દશા વિશે વાત કરતા આર અશ્વિને જણાવ્યું હતું કે, આ દ્રશ્ય પંજાબની ટીમની અંદર ચાલી રહેલી ભારે હતાશા દર્શાવે છે. અશ્વિને કહ્યું, "મેં ટીવી સ્ક્રીન પર એક એવી તસવીર જોઈ જેણે મને અંદરથી હચમચાવી દીધો. રિકી પોન્ટિંગ ડગઆઉટમાં સાવ એકલા બેઠા હતા અને ભારે નિરાશામાં આગળ તરફ ઝૂકેલા હતા. તેમના મગજમાં ચોક્કસપણે વિચારોનું વાવાઝોડું ચાલી રહ્યું હશે. કારણ કે, એક સમયે આ ટીમ ટુર્નામેન્ટના ટોપ-૨ માં પહોંચવા માટે સૌથી મજબૂત દાવેદાર ગણાતી હતી." અશ્વિને પંજાબના કોચ પોન્ટિંગ અને કેપ્ટન શ્રેયસ ઐયર બંનેની વર્તમાન સ્થિતિ પર દુઃખ વ્યક્ત કર્યું હતું.
અશ્વિનને યાદ આવ્યા ૨૦૧૮ના દિવસો: હું પણ એ જ ખુરશી પર હતો...
અશ્વિને પંજાબ કિંગ્સમાં વિતાવેલા પોતાના જૂના દિવસો વાગોળતા એક મોટો ખુલાસો કર્યો હતો. તેમણે કહ્યું, "મને લાગે છે કે રિકી પોન્ટિંગ અત્યારે શૂન્યમનસ્ક થઈને પોતાની જાતને જ પૂછી રહ્યા હશે કે 'આખરે મેં ક્યાં ભૂલ કરી?' વર્ષ ૨૦૧૮ માં જ્યારે હું પંજાબ કિંગ્સનો કેપ્ટન હતો, ત્યારે હું પણ બરાબર આ જ ખુરશી પર બેઠો હતો અને આવી જ લાચારી તથા પરિસ્થિતિનો મેં સામનો કર્યો હતો." જોકે, અશ્વિને સ્પષ્ટ કર્યું હતું કે તેઓ અહીં માત્ર પોન્ટિંગનો બચાવ નથી કરી રહ્યા, પરંતુ ફ્રેન્ચાઈઝીના પાયાના આયોજનમાં જ મોટી ખામીઓ રહેલી છે.
વારંવાર હોમ ગ્રાઉન્ડ બદલવાના નિર્ણયની આકરી ટીકા
આર અશ્વિને પંજાબ કિંગ્સ મેનેજમેન્ટ દ્વારા પોતાની હોમ મેચો મુલ્લાનપુર અને ધર્મશાલા વચ્ચે અડધી-અડધી વિભાજીત કરવાના નિર્ણયની આકરી આલોચના કરી હતી. તેમણે ક્રિકેટિંગ લોજિક સમજાવતા કહ્યું કે, "દુનિયાની કોઈપણ ચેમ્પિયન ટીમ લીગ સ્ટેજ દરમિયાન પોતાના હોમ ગ્રાઉન્ડ્સ વારંવાર બદલતી નથી. પંજાબની ટીમ મુલ્લાનપુરમાં સરસ રમી રહી હતી અને મેચો જીતી રહી હતી, પરંતુ મેનેજમેન્ટે તેમને ધર્મશાલા મોકલી દીધા અને ટીમ ત્યાં સતત ૩ હોમ મેચો હારી ગઈ!"
તેમણે ઉમેર્યું કે, મુલ્લાનપુર અને ધર્મશાલાની પિચોની માટી ભલે સમાન હોય, પરંતુ બંને સ્ટેડિયમની ભૌગોલિક ઊંચાઈ (Altitude), હવામાન અને ત્યાંનો બોલનો ઉછાળો તદ્દન અલગ છે. ધર્મશાલામાં રમવું એ પંજાબ માટે હોમ ગેમ નહીં પરંતુ અવે (Away) મેચ જેવું બની ગયું હતું.
અશ્વિને મેનેજમેન્ટને આડે હાથ લેતા અંતમાં રોકડું પરખાવ્યું કે, "જો હોમ ગ્રાઉન્ડ બદલવાનો આ નિર્ણય માત્ર બિઝનેસ અને કમાણીના દ્રષ્ટિકોણથી લેવાયો હોય તો તે અલગ બાબત છે, પરંતુ જો તમારું અલ્ટીમેટ લક્ષ્ય મેચો જીતીને પ્લેઓફમાં ક્વોલિફાય થવાનું હોય, તો ક્રિકેટના મેદાન પર આવી બ્લન્ડર (મોટી ભૂલો) ક્યારેય પરવડી શકે નહીં."