ચેન્નઈ, તા.૦૭: ભારતમાં સામાન્ય રીતે રણજી કે દુલીપ ટ્રોફી જેવી સ્થાનિક (ડોમેસ્ટિક) ક્રિકેટ મેચો ખાલી સ્ટેડિયમમાં રમાતી હોય છે, પરંતુ રવિવારે ચેન્નઈના ઐતિહાસિક એમ. એ. ચિદમ્બરમ સ્ટેડિયમમાં એક અનોખો ઇતિહાસ રચાયો હતો. માત્ર ૧૫ વર્ષના ઉભરતા સ્ટાર બેટ્સમેન વૈભવ સૂર્યવંશીની તાબડતોડ બેટિંગ જોવા માટે હજારો ક્રિકેટપ્રેમીઓ સ્ટેડિયમ તરફ દોડી આવ્યા હતા. મેચ દરમિયાન જ્યારે વૈભવ બાઉન્ડ્રી લાઇન નજીક ગયો, ત્યારે સ્ટેડિયમમાં હાજર ચાહકોએ 'વૈભવ ભાઈ', 'વૈભવજી' અને 'વૈભવ-વૈભવ'ના નારા લગાવીને આખા વાતાવરણને રોમાંચક બનાવી દીધું હતું.

ચાહકોના આ જબરદસ્ત ઉત્સાહને જોઈને તમિલનાડુ ક્રિકેટ એસોસિએશને સી, ડી અને ઈ બ્લોકમાં પ્રેક્ષકો માટે ફ્રી એન્ટ્રી રાખી હતી. પરિણામે, સવારથી જ ૧૨,૦૦૦થી વધુ ચાહકો સ્ટેડિયમની સીટો પર ગોઠવાઈ ગયા હતા. સ્થાનિક ક્રિકેટમાં અગાઉ આવો ક્રેઝ ૩૦ જાન્યુઆરી ૨૦૨૫ના રોજ દિલ્હીમાં જોવા મળ્યો હતો, જ્યારે દિગ્ગજ ખેલાડી વિરાટ કોહલી ૧૨ વર્ષ પછી રણજી ટ્રોફી મેચ રમવા માટે મેદાનમાં ઉતર્યો હતો.

પર્ફોર્મન્સની વાત કરીએ તો વૈભવે પોતાના ફેન્સને સહેજ પણ નિરાશ કર્યા નહોતા. ઈસ્ટ ઝોન તરફથી ઓપનિંગ કરવા ઉતરેલા આ યુવા બેટ્સમેને સાઉથ ઝોનના બોલરો સામે માત્ર ૩૭ બોલમાં ૧ છગ્ગો અને ૫ ચોગ્ગાની મદદથી ૪૪ રનની વિસ્ફોટક ઇનિંગ રમી હતી. તેણે પોતાના સાથી ઓપનર અભિમન્યુ ઈશ્વરન (૮૬ બોલમાં ૭૨ રન) સાથે મળીને પ્રથમ વિકેટ માટે ૧૦૦ રનની મજબૂત ભાગીદારી નોંધાવી હતી. વૈભવના આ આક્રમક અંદાજે સાબિત કરી દીધું છે કે ભારતીય ક્રિકેટનું ભવિષ્ય ખૂબ જ સુરક્ષિત અને ચમકદાર હાથોમાં છે.