રોમ | તા. 05 જૂન, 2026 શ્રીલંકાના એથ્લેટિક્સ ઇતિહાસમાં આજે એક સુવર્ણ પ્રકરણ ઉમેરાયું છે. રોમમાં આયોજિત ડાયમંડ લીગમાં શ્રીલંકાના ૨૩ વર્ષીય સ્ટાર એથ્લેટ રુમેશ થરંગા પાથિરાજે અકલ્પનીય પ્રદર્શન કરતા ૯૨.૬૨ મીટરનો વિશ્વ-અગ્રણી થ્રો ફેંકીને સમગ્ર વિશ્વને સ્તબ્ધ કરી દીધું છે. આ વિજય સાથે તેમણે માત્ર ટૂર્નામેન્ટ જ નથી જીતી,

નીરજ ચોપરાના રેકોર્ડને પાછળ છોડ્યો

આ ઐતિહાસિક થ્રો સાથે પાથિરાજે ભારતના ઓલિમ્પિક ચેમ્પિયન નીરજ ચોપરાના ૯૦.૨૩ મીટરના વ્યક્તિગત શ્રેષ્ઠ અને ચાઇનીઝ તાઇપેઈના ચેંગ ચાઓ-ત્સુનના ૯૧.૩૬ મીટરના રેકોર્ડને પાછળ છોડી દીધા છે. હવે તે પાકિસ્તાનના અરશદ નદીમ બાદ ઇતિહાસમાં બીજા ક્રમના સર્વશ્રેષ્ઠ એશિયન ભાલા ફેંકનાર બની ગયા છે. રોમની આ મીટિંગમાં તેમનો વિજય કેટલો પ્રભુત્વશાળી હતો તે એ વાત પરથી સાબિત થાય છે કે રનર-અપ એન્ડરસન પીટર્સ તેમનાથી લગભગ ૯ મીટર પાછળ હતા.

ક્રિકેટરથી ભાલા ફેંકના 'કિંગ' સુધીની સફર

પાથિરાજની આ સફર અત્યંત પ્રેરણાદાયી છે. એક સમયે તેઓ શ્રીલંકાની ક્રિકેટ સિસ્ટમમાં એક તેજસ્વી ફાસ્ટ બોલર હતા, જેઓ ૧૩૪ કિમી/કલાકની ઝડપે બોલિંગ કરવાની ક્ષમતા ધરાવતા હતા. જોકે, પાછળથી તેમણે ક્રિકેટ છોડીને એથ્લેટિક્સમાં પોતાની કારકિર્દી બનાવવાનો જે હિંમતવાન નિર્ણય લીધો, તે આજે તેમને વિશ્વના ટોચના થ્રોઅર્સમાં લઈ આવ્યો છે. ૯૦-મીટરના જાદુઈ અવરોધને પાર કરનાર તેઓ દુનિયાના ગણ્યા-ગાંઠ્યા અને એશિયાના માત્ર ચોથા એથ્લેટ બન્યા છે.

ભવિષ્યની વૈશ્વિક ચેમ્પિયનશિપ માટે મોટા દાવેદાર

રોમમાં અનુકૂળ પરિસ્થિતિઓનો લાભ ઉઠાવતા પાથિરાજે પોતાની મહેનત અને દૃઢ નિશ્ચયને સફળતામાં બદલી નાખ્યો છે. આ વર્ષની શરૂઆતમાં જ ૮૯.૩૭ મીટરના પોતાના જૂના રાષ્ટ્રીય રેકોર્ડને તોડ્યા બાદ, આજે ૯૨.૬૨ મીટરના થ્રો સાથે તેમણે સાબિત કરી દીધું છે કે તેઓ લાંબા સમય સુધી વૈશ્વિક સ્પર્ધાઓમાં રાજ કરવા માટે તૈયાર છે. સમગ્ર એશિયામાં અત્યારે તેમના નામના સિક્કા વાગી રહ્યા છે અને રમત જગત આ યુવા સ્ટારને આગામી ઓલિમ્પિક્સ અને વર્લ્ડ ચેમ્પિયનશિપના મુખ્ય દાવેદાર તરીકે જોઈ રહ્યું છે.