ધર્મશાલા: IPL ૨૦૨૬ ના પ્લેઓફની રેસ હવે તેના અંતિમ તબક્કા અને સૌથી રોમાંચક વળાંક પર પહોંચી ગઈ છે. ધર્મશાલાના સુંદર સ્ટેડિયમમાં આજે દિલ્હી કેપિટલ્સ (DC) અને પંજાબ કિંગ્સ (PBKS) વચ્ચેની ટક્કર માત્ર એક મેચ નથી, પણ દિલ્હી માટે જીવતદાન સમાન છે. દિલ્હીના કેપ્ટન અક્ષર પટેલે ટોસ જીતીને પહાડોની ઠંડક અને ઝાકળના પરિબળને ધ્યાનમાં રાખીને પ્રથમ ફિલ્ડિંગ કરવાનો સાહસિક નિર્ણય લીધો છે.

દિલ્હીની ટીમમાં ધરખમ ફેરફારો

પ્લેઓફની રેસમાં ટકી રહેવા માટે દિલ્હી કેપિટલ્સ કોઈ પણ જોખમ લેવા તૈયાર છે. કેપ્ટન અક્ષર પટેલે પ્લેઈંગ ઈલેવનમાં કુલ ૫ ફેરફારો કરીને સૌને ચોંકાવી દીધા છે. ટીમમાં વિસ્ફોટક બેટ્સમેન ડેવિડ મિલર, યુવા પ્રતિભા સાહિલ પારખ અને માધવ તિવારીનો સમાવેશ કરવામાં આવ્યો છે. દિલ્હીની બેટિંગ લાઇન-અપમાં કેએલ રાહુલ અને ટ્રિસ્ટન સ્ટબ્સ જેવા ખેલાડીઓની હાજરી પંજાબના બોલરો માટે પડકારજનક સાબિત થઈ શકે છે.

પંજાબનો વળતો પ્રહાર અને નવું ડેબ્યૂ

બીજી તરફ, પંજાબ કિંગ્સે પણ પોતાની રણનીતિમાં ફેરફાર કર્યો છે. સ્ટાર બોલર લોકી ફર્ગ્યુસન ઈજાના કારણે બહાર થતા પંજાબે બેન દ્વારશિયસને આ મેચ દ્વારા ડેબ્યૂ કરવાની તક આપી છે. પ્રભસિમરન સિંહ અને શ્રેયસ ઐયરની જોડી પર પંજાબને સન્માનજનક સ્કોર સુધી પહોંચાડવાની જવાબદારી રહેશે. અર્શદીપ સિંહ અને યુઝવેન્દ્ર ચહલની સ્પિન-પેસ જોડી દિલ્હીના બેટ્સમેનોને રોકવા માટે સજ્જ છે.

બંને ટીમોની પ્લેઈંગ ઈલેવન:

પંજાબ કિંગ્સ: પ્રભસિમરન સિંહ (wk), પ્રિયાંશ આર્ય, કૂપર કોનોલી, શ્રેયસ ઐયર (c), સૂર્યાંશ શેડગે, માર્કસ સ્ટોઇનિસ, શશાંક સિંહ, માર્કો જેન્સેન, બેન દ્વારશુઈસ, અર્શદીપ સિંહ, યુઝવેન્દ્ર ચહલ.

દિલ્હી કેપિટલ્સ: અભિષેક પોરેલ, કેએલ રાહુલ, સાહિલ પારખ, ટ્રિસ્ટન સ્ટબ્સ, ડેવિડ મિલર, અક્ષર પટેલ (c), માધવ તિવારી, ઔકિબ નબી, લુંગી એનગીડી, મિશેલ સ્ટાર્ક, મુકેશ શર્મા.

ધર્મશાલાની હાઈ-વોલ્ટેજ મેચમાં દિલ્હીના આ ૫ ફેરફારો તેને પ્લેઓફની વધુ નજીક લઈ જશે કે પંજાબ બાજી મારી જશે, તે જોવું રસપ્રદ રહેશે!