પુડુચેરી, તા.૦૬: પુડુચેરી ખાતે ભારત A અને ઓસ્ટ્રેલિયા A વચ્ચે રમાઈ રહેલી રોમાંચક ૫૦ ઓવરની ક્રિકેટ મેચ દરમિયાન ભારતીય ફિલ્ડર દેવદત્ત પડિક્કલે પોતાની અદ્ભુત ચપળતા અને કૌશલ્ય દર્શાવીને એક અકલ્પનીય કેચ ઝડપ્યો છે. ટોસ જીતીને પહેલા બેટિંગ કરવા ઉતરેલી ઓસ્ટ્રેલિયા A ની ટીમને શરૂઆતમાં જ ભારતીય બોલરોએ બેકફૂટ પર ધકેલી દીધી હતી. મંગળવારે રમાયેલી આ મેચમાં પાવરપ્લે દરમિયાન સ્લિપમાં ઉભેલા પડિક્કલના આ શાનદાર ડાઇવિંગ કેચે સ્ટેડિયમમાં મોજુદ પ્રેક્ષકો અને ક્રિકેટ પ્રેમીઓને મંત્રમુગ્ધ કરી દીધા હતા.

મેચની શરૂઆતમાં જ ભારતીય ફાસ્ટ બોલર યશ ઠાકુરે ચોક્કસ લાઇન અને લેન્થ સાથે બોલિંગ કરીને કાંગારૂ ટીમને બે મોટા ઝટકા આપ્યા હતા. ત્યારબાદ ઇનિંગ્સની પાંચમી ઓવરમાં અર્શદ ખાને શાનદાર સ્પેલ ફેંકીને ઓસ્ટ્રેલિયન બેટ્સમેન જોશ ફિલિપને ક્રીઝ પર રન બનાવવા માટે ઝંઝોડી મૂક્યા હતા. અર્શદના એક સ્વિંગ બોલ પર બેટ્સમેન થાપ ખાઈ ગયો હતો અને બોલ બેટની બહારની કિનારી (એજ) લઈને ફર્સ્ટ સ્લિપ તરફ ઝડપથી હવામાં ફંગોળાયો હતો.

સ્લિપમાં ફિલ્ડિંગ કરી રહેલા કર્ણાટકના યુવા ખેલાડી દેવદત્ત પડિક્કલે સેકન્ડના છઠ્ઠા ભાગમાં ત્વરિત પ્રતિક્રિયા આપી હતી. બોલને જમીન પર અડકે તે પહેલાં જ પડિક્કલે હવામાં પૂરી લંબાઈ સાથે અદ્ભુત ડાઇવ લગાવી હતી. તેણે બંને હાથ સંપૂર્ણપણે લંબાવીને બોલને જમીનથી થોડા જ ઇંચ ઉપર સુરક્ષિત રીતે પકડી લીધો હતો. આ અદ્ભુત કેચના પરિણામે ઓસ્ટ્રેલિયા A ટીમે માત્ર ૩૦ રનના સ્કોર પર પોતાની ત્રીજી મહત્વપૂર્ણ વિકેટ ગુમાવી દીધી હતી.

પ્રારંભિક આંચકાઓ બાદ ઓસ્ટ્રેલિયા A ની ઇનિંગ્સને નાથન મેકસવીની અને કેપ્ટન વિલ સધરલેન્ડે સંભાળી હતી. બંને બેટ્સમેનોએ ક્રીઝ પર ટકી રહીને શાનદાર અડધી સદીઓ ફટકારી હતી અને પોતાની ટીમને પ્રારંભિક સંકટમાંથી બહાર કાઢીને સન્માનજનક સ્કોર તરફ આગળ ધપાવી હતી. ભારતીય બોલરોના આક્રમણ સામે ઓસ્ટ્રેલિયન મધ્યક્રમે મજબૂત પ્રતિકાર દર્શાવતા મેચ રોમાંચક મોડ પર પહોંચી ગઈ હતી.

ઉલ્લેખનીય છે કે આ ૫૦ ઓવરની શ્રેણી ઓસ્ટ્રેલિયા A ના ભારત પ્રવાસનો એક મહત્વપૂર્ણ ભાગ છે. આ પ્રવાસ આગામી વર્ષે યોજાનારી પ્રતિષ્ઠિત બોર્ડર-ગાવસ્કર ટ્રોફી માટે ખૂબ જ અગત્યનો માનવામાં આવે છે. આ પ્રવાસ દરમિયાન ઓસ્ટ્રેલિયન ટીમે ૨ બિન-સત્તાવાર ટેસ્ટ મેચો રમી હતી અને હાલમાં પુડુચેરીના મેદાન પર ત્રણ મેચોની એક દિવસીય શ્રેણી રમાઈ રહી છે, જ્યાં બંને ટીમોના યુવા ખેલાડીઓ પોતાની ક્ષમતા સાબિત કરી રહ્યા છે.

ઓસ્ટ્રેલિયા A ના ઘણા યુવા ખેલાડીઓ આ સિરીઝમાં શ્રેષ્ઠ પ્રદર્શન કરીને પોતાની રાષ્ટ્રીય ટીમમાં સ્થાન મેળવવાનો પ્રયાસ કરી રહ્યા છે, જ્યારે ભારત A ના ખેલાડીઓ પણ પણ આગામી આંતરરાષ્ટ્રીય શ્રેણીઓ માટે પસંદગીકારોનું ધ્યાન ખેંચવા સખત મહેનત કરી રહ્યા છે. પડિક્કલનો આ અદ્ભુત કેચ અને ભારતીય બોલરોનું પ્રદર્શન શ્રેણીની આગામી મેચો માટે ભારતીય ટીમનો આત્મવિશ્વાસ બુલંદ કરશે.